Baku mate ema. imajen/Ilustrasaun

DILI, 25 janeiru 2022 (TATOLI)— Komandu Polísia Nasionál Timor-Leste munisípiu Covalima detein membru Unidade Polísia Marítima na’in-neen, ne’ebé deskonfia baku mate vítima júlio Amarál iha suku Suai-Loro, postu administrativu Suai-vila, munisípiu Covalima.

Komandante PNTL Munisípiu Covalima, Asistente Superintendente Polísia Basilio de Jesus, konta tuir kronolojia katak motivu hosi akontesimentu tanba vítima ka matebian no suspeitu na’in-neen partisipa iha inagurasaun uma lisan iha suku Suai-Loro-Covalima,

Komandante Munisipiu Covalima, Superintendente Asistente, Basilio de Jesus. Imajen/Eugénio Pereira

“Kazu ne’e akontese domingu (23/01), tuku 3:30, madrugada, sira hotu lanu no sira haksesuk malu ho buat kiik-oan ida, maibé dada to’o vitíma Júlio Amaral lakon vida no nia-alin nain rua kanek todan. Nune’e ami tun ba kedan halo intervensaun no halo investigasaun ba testamuña nain haat hosi akontesimentu ne’e no ita submete kedan kazu refere ba Ministeriu Públiku hodi haree tuir prosesu legál,” Asistente Superintendente Polísia Basilio hateten ba Agência TATOLI, via telefónika, tersa ne’e.

Oknum UPM ne’ebé deskonfia envolve kazu ne’e ho inisiál hanesan, MDD, LMA, GDN, MMF, JB. Enkuantu okum PNTL ida seluk Komandu Munisipiu Covalima la konsege temi nia inisiál.

“Ema ne’ebé mak ita deskonfia envolve iha kazu ida ne’e, Komandu Munisípiu Covalima detein ona iha sela detensaun hodi hein oras 72 atu submete ba primeiru interigatóriu iha tribunal,” Komandante PNTL Munisípiu Covalima, Asistente Superintendente Polísia Basilio de Jesus ba Agência TATOLI, via telefónika, tersa ne’e.

Komandante ne’e informa sira na’in-neen direitamente mai aprezenta aan iha Komandu PNTL Covalima hafoin akotesimentu no dezarma kedan iha Domingu ne’e.

“Iha prosesu investigasaun hatudu indikasaun ida forte, maibé ita nafatin respeita ema nian direitu hodi hein desizaun hosi Tribunál liuliu primeiru interogátoriu, aban (26/01),” nia akresenta.

Alende ne’e, Komandante Basilio dehan iha rezultadu otópsia hatudu mós katak Júlio Amarál lakon vida tanba hetan agresaun fíziku ka baku mate.

“Konforme rezultadu otópsia hatudu vitima ne’e baku mate la’os tiru”, Komandante PNTL Covalima ne’e konklui.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here