Membru Konsellu Imprensa, Expedito Loro Dias Ximenes. Imajen Tatoli/Francisco Sony

DILI, 24 janeiru 2022 (TATOLI)—Prezidente Coselho de Imprensa (CI), Virgílio da Silva Guterres, indika konsilleiru Expedito Dias Ximenes mak sei asume prezidente interinu CI nian hahú hosi 24 janeiru to’o 24 abríl 2022, tanba iha tempu badak nia sei pronunsia ninia kandidatura ba Prezidente Repúblika períodu 2022-2027.

Nia hatutan, tuir lei komuniksaun sosiál no estatutu Conselho de Imprensa hateten bainhira Prezidente Conselho de Imprensa auzente ka iha impedimentu ruma tenke nomea konsilleiru sira seluk atu kontinua hala’o funsaun prezidente Conselho de Imprensa ninian.

Prezidente Konsellu Imprensa, Virgílio da Silva Guterres. Imajen TATOLI/Egas Cristóvão.

“Ohin ha’u hakarak hato’o ba públiku katak durante ne’e hala’o ha’u-nia funsaun hanesan Prezidente Conselho de Imprensa (CI), maibé tanba ha’u pronunsia atu kandidata-an ba Prezidente Repúblika entaun ha’u tenke husik ha’u-nia funsaun ne’e hodi fó fiar ba konsilleiru CI, Expedito Dias Ximenes, hanesan Prezidente interinu CI nian,” Virgílio da Silva Guterres deklara liuhosi komunikadu iimprensa ne’ebé realiza iha salaun CI, Quintal Boot, Dili, segunda ne’e.

Bazeia ba Lei eleitorál hateten, kandidatu sé-sé de’it mak kaer kargu ba iha instituisaun públiku ka privadu iha direitu ba dispensa hosi nia funsaun no mós hosi legalizasaun hotu ne’ebé simu durante nia pozisaun.

Tanba ne’e, nia hakarak informa ofisialmente ba Plenáriu Conselho de Imprensa ida-ne’e kona-ba ninia desizaun polítika atu konkore iha Eleisaun Prezidensiál 2022-2027 ne’ebé tuir Dekretu Prezidensiál Númeru 2/2022, 15 janeiru, sei hala’o iha 19 Marsu 2022.

Desizaun politika ne’ebé nu’udar ezersísiu direitu konstitusionál, hanesan haktuir iha konstituisaun RDTL artigu 75, relasiona ho elejibilidade ba kandidatu Prezidente Republika, konsidera katak ezersísiu direitu konstitusionál ne’e labele tama konflitu ho dever no kompeténsia sira-ne’ebé atribui ba nia nu’udar Prezidente Conselho de Imprensa hanesan haktuir iha númeru 1, artigu 24, estatutu Conselho de Imprensa no artigu 8.

“Regulamentu Plenáriu Conselho Imprensa nian, ha’u hakarak hato’o ha’u-nia pedidu de direitu dispensa hosi funsaun nu’udar Prezidente Conselho de Imprensa,” nia hateten.

Hahusuk ba direitu dispensa ne’e nu’udar kondisaun legál ne’ebé kandidatu ida-idak tenke prenxe durante kampaña eleitorál, hanesan haktuir iha númeru 2, artigu 8, Republikasaun Lei Nú. 7/2006, 28 dezembru, Lei Eleitorál Prezidente Repúblika relasiona ho imunidade no regalia katak “Durante a campanha eleitoral, o candidato dispensa do exercicio das respetivas funções, sejam elas públicas ou tem direito privadas, contando esse tempo para todos os efeitos, incluindo o direito à retribuição, como tempo de serviço efetivo.

Nia dehan, direitu dispensa ne’e sei efektivu hahú iha loron 24 fulan-janeiru to’o loron 24 fulan-abríl tinan 2022.

“Nu’udar konsekuénsia hosi direitu dispensa ne’e, ha’u sei auzente iha atividade hotu-hotu, internál ka eksternál Conselho de Imprensa nian durante períodu ne’ebé refere iha leten. Iha períodu ha’u-nia auzensia nian, hanesan haktuir iha númeru 2, artigu 24, Dekretu-lei Nú. 25/2015, 5 Agostu, Estatuto do Conselho de Imprensa no artigu 10 Regulamentu Conselho de Imprensa Nú. 1/2021/, 26 favereiru, Funsionamentu Plenáriu Conselho de Imprensa no subtituisaun Prezidente, ha’u hatudu (indika) Expedito Loro Dias Ximenes, Konsilleiru Conselho de Imprensa nian,” nia dehan.

Maske nune’e, la signifika katak nia sei la ko’alia kona-ba liberdade imprense, liberdade espresaun maibé buat ne’ebé nia sei labele halo ne’e mak reprezenta Conselho de Imprensa ka ko’alia hodi Conselho de Imprensa nia naran.

“Hanesan sidadaun no mós hanesan ema ne’ebé durante ne’e halo advokásia ba liberdade imprensa no liberdade espresaun, ha’u sei kontinua no ida-ne’e sei sai hanesan foku ida ba ha’u-nia lala’ok polítika,” Virgílio da Silva Guterres hateten.

Nune’e, nia rekomenda ba órgaun komunikasaun sosiál sira atu respeitu direitu ba kandidatu Prezidente Repúblika no partidu polítika sira iha eleisaun prezidensiál 2022 no parlamentar 2023.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here