Autoridade RAEOA hatuur fatuk dahuluk ba konstrusaun klínika TBC iha suku Nipani. Imajen mídia ZEEMS.

DILI, 24 janeiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), hahú kontrui klínika izolamentu ba moras Tuberculoze (TBC) atu separa atendimentu adekuada nune’e bele evita transmisaun hada’et iha sosiedade.

Sekretáriu Rejionál ba Asuntu Saúde, Manuel da Costa, esplika fasilidade ne’ebé konstrui distánsia dook hosi vila, nune’e autoridade deside lokaliza iha suku Nipani, sub-rejiaun Pante Makasar, tanba diresaun saúde propoin ona iha tinan kotuk, nune’e, iha 21 janeiru, ofisialmente Prezidente Autoridade RAEOA hahú hatuur fatuk dahuluk ba obra foun ne’e.

Nia informa, objetivu hosi fasilidade ne’e atu fó garantia ba atendimentu saúde iha RAEOA tanba futuru Hospitál Referénsia Oé-Cusse, sei sai alternativa ida hodi fó satizfasaun ba komunidade no sosiedade.

“Autoridade nia intensaun, iha futuru pesoál saúde sira bele fó tratamentu adekuada ba komunidade, ne’ebé sofre moras TBC, nune’e bele asegura tratamentu no akompañamentu, ho fasilidade adekuadu, nune’e bele senti konfortavel no rekupera hosi situasaun ne’e,” Manuel da Costa informa ba Agência Tatoli, liuhosi telefónika segunda ne’e.

Nia fó-sai katak RAEOA tinan barak konsulta pasiente moras TBC, iha sala izolamentu Hospital Referénsia Oé-Cusse, tanba ne’e moras ne’e bele hada’et, entaun autoridade deside separa fatin ida, nune’e bele hetan tratamentu ketak hodi evita transmisaun ba pasiente seluk.

Xefe suku Lela-Ufe, hosi sub-rejiaun Nítibe, José Neno Sila, agradese ba autoridade RAEOA, tanba tinan ne’e autoridade hahú prepara ona fasilidade nune’e bele fó atendimentu dignu ba pasiente TBC sira.

“Ha’u agradese, tanba dalaruma pasiente balun moe ho sira-nia kondisaun entaun sira la ba konsulta tanba, ema barak ba konsentra de’it iha hospital boot, entaun balu halai fali ba ai-moruk tradisionál, maibé tinan ne’e autoridade hahú prepara ona fatin ne’e, ha’u hanoin sei fó tulun ba pasiente sira atu kolabora hodi hetan tratamentu dignu, tanba fatin ne’e espesiál ba sira,” autoridade lokál ne’e orgullu.

Tuir dadus relata hosi adjuntu diretór servisu saúde rejionál, Fagundu Lafo, katak daudaun parte saúde rejiaun rejista ona pasiente TBC hamutuk 34 inklui pasiente tuberkuloze pulmonáriu no extrapulmonáriu.

“Iha 2021 rejista kazu konfirmadu bakterialojia ba pulmaun sira na’in-12, detetadu liuhosi diagnóstiku iha klínika sira na’in-22, ne’ebé totál kazu extrapulmaun konfirmadu bakterialojia foun no rekaida ne’ebé hetan ona tratamentu, maibé ikus sira lakohi koopera ho parte saúde hamutuk na’in-34,” nia informa.

Entretantu, projetu klínika izolamentu ba TBC ne’e ezekuta hosi empreza Tafen Kuan Unipesoál Lda, ho valór kontratu $154,551.69 ne’ebé aloka hosi Orsamentu Jerál Estadu (OJE) 2021 ho durasaun servisu durante fulan haat.

Fasilidade iha obra ne’e komposta hosi rezidénsia ba pesoál saúde nian, sala izolamentu ba pasiente TBC hamutuk sala-sia (9), sala ba atendimentu, sala laboratóriu no sala ba farmásia kompleta ho moru.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here