Ministériu Saúde raliza seimináriu ho funsionáriu sira hotu kona-ba planu mikro vasinasaun kontra Covid-19 iha Timor-Leste. Iha salaun Novu Turimsu, kinta (20/01). Imajen Tatoli/Francisco Sony

DILI, 20 janeiru 2022 (TATOLI)— Ministeriu Saude liuhosi Vise-Ministru Saúde, Bonifácio Mau-Coli dos Reis hala’o abertura semináriu mikroplanu hodi identifika prioridade, roteiru, no orsamentu ba kampaña no implementasaun vasinasaun kontra Covid-19 iha Timor-Leste.

Mikroplanu nu’udar baze ba desizaun polítika, desizaun ba akizisaun no finansiamentu kontinua hosi doadór sira, nune’e vasina disponivél ba sidadaun elijivél iha Timor-Leste.

Notísia relevante: COVID-19: kazu detetadu pozitivu ida no ativu 15

Semináriu Mikroplanu vasinasaun kontra Covid-19, nu’udar mós oportunidade di’ak hodi diskute no dezenvolve planu detalladu no kompreensivu ba implementasaun vasina kontra Covid-19 ba doze dahuluk, daruak no doze reforsu ka booster ba grupu alvu sira.

Vise-Ministru Saúde, Bonifácio Maucoli dos Reis. Imajen Tatoli/Francisco Sony

“Asuntu ne’ebé mak ita halo ne’e liuliu ba mikroplanu atubele prepara rekursu umanu, finanseira, lojístika, kolaborasaun, koordenasaun, no komunikasaun atubele hala’o vasina ba ema sira  ne’ebé mak to’o agora seidauk simu vasina  COVID-19 doze dahuluk no daruak,” Vise Ministru Saúde Maucoli, hateten ba jornalista sira, hafoin ramata semináriu iha Novo-Turizmu-Licidere, Dili, kinta ne’e.

Tuir dadus, sidadaun 30% iha territóriu laran mak seidauk vasina, tanba ne’e ho mikroplanu bele kontribui tan ideia atu halo mekanismu hodi to’o iha área rurál atubele hasa’e kobertura vasinasaun.

Vise MauColi rekoñese realidade iha dezafiu barak durante implementasaun vasina covid-19, dezafiu hasoru komunidade, dezafiu iha terrenu, dezafiu ba kestaun lojístika, dezafiu hasoru mídia sosial no elektronika ne’ebé hala’o kampaña “Hoaks” hodi hata’uk komunidade ba simu vasina kontra COVID-19.

“Maibé, ita bele ultrapassa situasaun sira-ne’e hotu hodi hasa’e kobertura ba primeira doze, segunda doze no doze boosters,” nia akresenta.

Kazu COVID-19

Tanba Covid-19 sai nafatin ameasa ba saúde públika iha mundu tomak ho total kazu to’o janeiru 2022, hamutuk kazu 295. 244. 646, ne’ebé globalmente hamate ona ema 5.457.604.

Partikularmente ba kazu Covid-19 iha Timor Leste, hosi total kazu 19.866, ema ne’ebé mate tanba Covid-19 to’o janeiru 2022, hamutuk 122.  To’o 19 janeiru kazu ativu hamutuk 15.

Vise-Ministru dehan esforsu oioin iha área saúde kontinua realiza ho forma promosaun, edukasaun, prevensaun, detesaun no tratamentu hodi diminui kazu foun, aumenta rekuperasaun ba kazu sira hodi evita ema mate tan Covid-19.

Partisipasaun ho espíritu no optimismu husi komunidade hodi hola parte ativu iha esforsu preventivu sira inklui partisipasaun ativu iha vasinasaun kontra Covid-19 ne’ebé lori Timor-Leste nu’udar nasaun dalima husi nasaun sira iha Sudeste Aziátiku ne’ebé konsege proteje populasaun ho kobertura 40% hosi total populasaun ba doze rua vasina kontra Covid-19.

Progresu imunizasaun

Nune’e, progresu vasina kontra Covid-19 iha Timor-Leste populasaun ho idade tinan 18 ne’ebé hetan ona vasinasaun kontra Covid-19 ba dala rua ho totál 528.680 ka ekivalensia ho 70%.

Alende ne’e, programa vasina kontra Covid-19 espande mós ba labarik ho idade tinan 12 no menus hosi idade18 ho vasina Pfizer iha eskola no labarik sira iha munisípiu Dili, hamutuk 36.054 ka 70.8%. Kona-ba vasina ba doze booster ka reforsu mós hala’o ona ba grupu perioritáriu sira ho kobertura 5.030 ka 7% iha Munisipiu Dili.

“Ho konsiderasaun ba variante foun SARS-COV-2, Omicron ne’ebé ho tranzmisaun la’o lais tebes iha nasaun barak iha mundu tomak, implementasaun planu vasinasaun kontra Covid-19 nu’udar estratejia sentral hodi prezerva vida umana iha kontestu pandemia Covid-19,” Vise Maucoli akresenta.

Ho nune’e,  Ministériu Saúde kontinua hala’o estratéjia vasinasaun kontra Covid-19 no rekoñese importansia hosi planeamentu ba implementasaun vasina kontra Covid-19 konsentradu iha polítika ne’ebé bele asegura sistema sosa vasina no alokasaun rekursu.

“Atu implementa ho susesu, esensiál tebes esforsu kolaborativu entre governu, parseiru dezenvolvimentu, ajénsia, organizasaun, akademia, sosiedade sívil, krensa relojioza no komunidade,”Maucoli afirma.

Iha servisu saúde munisipál no fasilidade saúde sira, aseitasaun no distribuisaun ekuitativa husi vasina Covid-19 depende husi mikroplanu ne’ebé diak no kontinuamente finansiadu.

Nune’e, Maucoli lori Ministériu Saúde nia naran hakarak hato’o rekoñesimentu ba Komisaun no Sub-komisaun ba vasina kontra COVID-19 no parte interesadu ka entidade sira hotu WHO, UNICEF, Doadór, USAID, DFAT, no sira seluk.

“Ha’u-nia agradesimentu bo’ot ba diskusaun ba mikroplanu ida-ne’e, hein katak depoisde workshop ida-ne’e sei hamosu planu detalladu ba implementasaun vasina kontra COVID-19,” nia agradese.

Reprezentante Organizasaun Mundiál Saúde (OMS) iha Timor-Leste, Arvind Mathur. Imajen Tatoli/Francisco Sony

Iha biban hanesan, Reprezentante Organizasaun Mundiál Saúde (OMS) iha Timor-Leste, Arvind Mathur, hateten maski omicrom hamosu moras kaman liu delta, maibé omicrom nafatin sai virus ne’ebé perigu ba ema hotu liuliu ba sira ne’ebé mak seidauk simu vasina tanba ne’e mak husu ema hotu atu vasina.

“Vasinasaun to’o agora nafatin sai meiu ne’ebé mak efetivu hodi asegura ita hosi moras perigu no prevene ita atu baixa iha ospitál no hasoru mate, nune’e ita tenke hasae ita-nia esforsu hodi fó vasina ba populasaun hotu liuliu ba sira ne’ebé ho idozu no kormobidade,” Reprezentante OMS ne’e enkoraja.

Notísia relevante: Pesoál liña frente simu ona vasina doze datoluk hamutuk 4.226

Jornalista: Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here