Kandidata Prezidente Repúblika períodu 2022-2007, Milena Pires. Imajen/Mídia PR.

DILI, 20 janeiru 2022 (TATOLI)—Kandidatura Prezidente Repúblika períodu 2022-2007, Milena Pires hateten, razaun deside kandidata an ba Prezidente Repúblika tanba iha dever síviku hakarak kontribui ba dezenvolvimetu iha Timor-Leste.

“Ha’u deside atu kandidata an ba Prezidente Repúblika ho razaun tanba ha’u-nia dever siviku nu’udar timor-oan hakarak kontribui ba dezenvolvimentu ba Timor-Leste nomós povu nia moris di’ak hodi bele fó kontribuisaun ba joven sira-ne’ebé mak durante ne’e hasoru dezafiu hanesan kestaun atu hetan servisu, kriasaun kampu traballu. Ida-ne’e importante,” Milena Pires hateten ba jornalista sira bainhira Sekretária Estadu Igualdade no Inkluzaun (SEII) konvida nia fahe nia esperiénsia kona-ba ninia kandidatura ba feto sira, iha salaun Delta Nova, Dili, kinta ne’e.

Kandidatura Prezidente Repúblika ne’e hateten, SEII konvida nia atu fahe esperiénsia ba feto maluk sira kona-ba nia kandidata an ba Prezidente Repúblika iha períodu 2022-2027, liu-liu bele hato’o hanoin balun kona-ba asuntu oioin liu-liu kona-ba aspetu inkluzaun sosiál no igualdade jenéru.

Sekretária Estadu ba Igualdade no Inkluzaun, Maria José da Fonseca Monteiro de Jesus, hateten SEII konvida kandidatura Prezidente Repúblika periodu 2022-2027, Milena Pires, atu fahe nia esperensia no loke espasu ba feto sira tuur hamutuk hodi fahe hanoin ba malu atu aborda asuntu oioin sai hanesan kultura ida.

“Ita hakarak hamosu kultura foun ida atu loke Plata forma espasu ba feto sira atu bele tuur hamutuk fahe hanoin ba malu hodi aborda asuntu oi-oin. Ita ko’alia dezde tinan uluk ita hanoin eleisaun prezidensiál atu mai no feto sira mós atu kandidata an no iha fulan dezembru ami hakbesik ba atuál Vise Primeiru Ministru Armanda Berta dos Santos mak labele. Entaun, ohin Milena Pires mak partisipa,” nia informa.

Iha sorumutu ne’e, lideransa feto no feto potensiál sira fahe hanoin no esperiénsia ba malu hodi hodi hamosu espasu harii rede no haburas liután komunikasaun entre parte oioin ne’ebé kandidatura PR Milena Pires sai oradór hodi ko’alia kona-ba Timor-Leste ida ba timor-oan haree ba aspetu hotu.

“Fulan-fulan ita bolu maluk feto hosi setór oioin mai hodi hato’o sira-nia hanoin no fahe esperiénsia ba malu atu bele hariku malu hodi loke dalan haforsa rede ne’ebé iha. Ita seidauk hamosu sinerjia ida ho oportunidade ne’e maluk feto sira halibur malu sei hatene feto seluk atu kandidata-an ba PR ami sei hakbesik ba sira,” nia hateten.

Sekretária Estadu Igualdade no Inkluzaun (SEII) hanesan instituisaun Governu ne’ebé ho knar no responsabilidade atu koordena no halo advokasia hodi asegura integrasaun politíka ba abordajen integrada jeneru, iha polítika lei no orsamentu Estadu nian atu halakon diskriminasaun no violénsia oioin hasoru feto, labarik feto, ema portadora defisiénsia sira hosi komunidade.

Timor-Leste atinje ona progresu balun iha promove feto ba pozisaun lideransa no foti desizaun nian iha setór públiku no setór privadu.

Daudaun ne’e feto iha parlamentu nasionál iha 40%, membru Governu 16%, iha administrasaun públika 23%. Iha nivel lokál hanesan xefe suku feto iha 5% no xefe aldeia feto 4%.

Maske hasoru bareira dezafiu oioin feto kontinua halo esforsu no iha vontade hodi hatudu sira-nia kapasidade lideransa hodi kontribui ba mudansa ne’ebé di’akliu.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here