Angela Freitas. Imajen Tatoli/Anito Soares.

DILI, 20 janeiru 2022 (TATOLI)-Angela Freitas, kinta ne’e ofisialmente deklara ba públiku hodi kandidata an ba Prezidente Repúblika nu’udar kandidatura indepedente ida, atu bele kompete ho kandidatu hirak seluk iha eleisaun prezidensiál 2022 ne’ebé monu iha 19 marsu.

Angela Freitas hateten, ninia kandidatura ho lema ‘Unidade, Estabilidade no Dezenvolvimentu Vota ba Nia Hamutuk Salva Nasaun Antes Tarde no Vizaun Servisu Hamutuk ba Dezenvolvementu Timor-Leste ho Estadu Forte, Dignu Justu no Prosperidade”.

“Ho dekretu Prezidente Repúblika nian fó sai no ohin ha’u deklara ofisialmente ba públiku kandidatura ba Prezidente Repúbliku ho kandidatu indepedente. Ha’u mai ho vizaun servisu hamutuk ba dezenvolvementu Timor-Leste ho Estadu forte, dignu justu no prosperidade,” Angela Freitas deklara ba jornalista sira liuhosi konferénsia imprensa ne’ebé hala’o iha iha Bairru Formoza, Dili.

Kandidata PR ne’e, sei hala’o nia misaun defende soberania no personalidade nasaun ho dignu, hametin Estadu direitu demokrátiku, haree ba bens-estar no haforsa ekonomia povu, organiza Governu ida-ne’ebé firme no efikás.

Daudaun ne’e, nia parte halo hela preparasaun no forsa ne’ebé fó apoiu ne’e másimu tebes, relativamente rekolla kartaun eleitorál hosi apoiante to’o ona rihun 12 no iha tempu badak sei halo rejistu iha Tribunál Rekursu.

“Hanesan feto no inan ida prontu kompete iha prosesu demokrásia ne’e ho kandidatu independente hamutuk ho povu hotu hakarak halo mudansa,” nia hateten.

Nia kandidata an sai Prezidente Repúblika ne’e, sei sai Prezidente ba povu tomak no sei la fó dalan ba interrese ema ida-rua ka grupu ida-rua no interse partidu, atu interven iha desizaun ne’ebé Prezidente foti no atu garante indepedénsia nasionál no unidade Estadu nian.

Jornalista : Nelson de Sousa

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here