Xefe suku Babulo ho komunidade sira hamoos hela bee-matan Bai-Hira hodi dada rasik ba hela-fatin. Imajen espesiál.

DILI, 16 janeiru 2022 (TATOLI) – Uma-kain 43 hosi aldeia neen (6), suku Balulo, postu adiministrativu Uatulari, munisípiu Viqueque, kontribui osan dada rasik bee-moos maibé osan kontribuisaun ne’e la sufisiente atu sosa paralon tanba ho distánsia kilómetru ida-resin.

Xefe suku Babulo, Mário Trindade , informa, durante ne’e komunidade-sira enfrenta krize bee-moos atu konsumu. Tanba ne’e, komunidade hosi aldeia neen hamosu inisiativa hamoos bee mata Bai-Hira hodi dada ba aldeia hodi konsumu.

Xefe suku ne’e fó-sai katak, uma-kain 43 ne’e hamosu inisiativa hodi hamoos bee-matan no komunidade sira maka kontribui rasik osan hodi halo kanalizasaun  bee-moos.

Entretantu Programa Nasionál Dezenvolvimentu Suku (PNDS) dada ona bee-moos ba tinan 2016 iha suku Babulu.  Maibé, bee ne’e presiza enérjia eletrisidade entaun ahi mate bee la-sai.

“Hosi inisiativa ne’e, komunidade uma-kain 43 tau osan hamutuk kada uma-kain kontribui osan $15 hodi sosa simentu, rai-henek no paralon, maibé ami sukat osan ninia montante ne’ebé komunidade sira hatama la sufisiente,” Xefe suku Babulo, Mário Trindade informa ba Agência TATOLI, liuhosi telefónika, domingu ne’e.

Nune’e osan kontribuisaun hosi uma-kain 43 hamutuk $645, no komunidade sira uza ona osan $190 halo tanki bee nian. Osan restu hela $ 455 ne’ebé atu sosa tán paralon maibé osan ne’e la sufisiente tanba hosi bee matan kuaze kilómteru ida-resin.

“Osan restu iha $455, atu sosa tán paralon maibé osan ne’e lato’o, ne’ebé ami sei tuur hamutuk tán maka buka dalan,” xefe suku akresenta.

Autoridade lokál ne’e husu Governu tulun netik paralon bee nian ba komunidade tanba osan ne’ebé komunidade tau hamutuk la sufisiente.

Bee-matan Bai-Hira ne’e sei benifísia ba aldeia neen hanesan aldeia  Abadere, Asamuta, Abu’u, Liaside, Roma  no aldeia Kota Nisi ho totál uma-kain 43 no totál populasaun na’in 200-resin.

Jornalista         : Vitorino Lopes da Costa

Editór               : Evaristo Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here