Diretora STAE RAEOA, Luiza da Costa. Imajen Tatoli/Abílio Elo Nini.

DILI, 17 janeiru 2022 (TATOLI) – Seketariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), daudaun ne’e rekruta ona funsionáriu kontratadu brigadista na’in-60 hodi destaka sira iha sentru votasaun 60 iha territóriu Oé-Cusse.

“Ita rekruta ona brigada na’in-60, hodi prepara sira ba Eleisaun Prezidensiál ba períodu ne’e, tanba ne’e mak ita rekruta hodi destaka sira iha sentru votasaun 60 iha sub-rejiaun haat, tanba eleisaun ne’e sei realiza iha marsu tinan ne’e,” Diretora STAE RAEOA, Luíza da Costa, informa ba Agência Tatoli liuhosi telefónika, segunda ne’e.

Nia fó-sai katak, daudaun ne’e brigada sira na’in-60 ne’e hahú serbisu iha sentru STAE Oé-Cusse, tanba kontratu ne’ebé Governu kontrata sira durante fulan-haat, hahú hosi janeiru sei termina iha abríl 2022.

Purtantu, kona-ba rezultadu dadu resenseamentu eleitór sira durante ne’e ekipa sira rekolla iha baze, parte STAE RAEOA seidauk sinkroniza tanba ekipamentu hanesan laptop submete hotu ba iha nasionál mak hafoin halo sinkronizasaun ba públiku, tanba prosesu resenseamentu eleitorál no atualizasaun baze dadus ensera iha 14 janeiru 2022 ne’e.

“Maibé dadús provizóriu antes ne’e, komesa hosi janeiru to’o outubru 2021 ita prodús ona kartaun eleitorál foun hamutuk ema na’in-1.917, dadus ne’e inklui mós atividade resenseamentu eleitorál no atualizasaun baze dadús iha sub-rejiaun tolu Pante Makasar, Nítibe no Pássabe nian,” nia fó-sai.

Nune’e, daudaun ne’e STAE RAEOA prepara ona sentru votasaun 60 no estasaun votasaun hamutuk 88. Entretantu, totál eleitorál provizóriu iha Rejiaun Administrativa Espesiál Oé-Cusse Ambeno hamutuk 50.293 komposta hosi mane 25.655 no feto 24.638.

Notisia relevante: STAE RAEOA rejista eleitór foun 1.917

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan