Diretora STAE RAEOA, Luíza da Costa. Imajen Tatoli/Abílio Elo Nini.

OÉ-CUSSE, 15 novembru 2021 (TATOLI) — Sekretariadu Tékniku Administrasaun Eleitorál (STAE) iha Rejiaun Administrativa Espesiál Oé-Cusse Ambeno (RAEOA) rejista eleitór foun na’in-1.917.

Hosi eleitór foun na’in-1.917 ne’e komposta hosi feto 970 no mane 947 hosi sub-rejiaun Pante Makasar, Oésilo, Pássabe no Nítibe.

“Iha janeiru to’o outubru, ita prodús ona kartaun eleitorál foun hamutuk 1.917, dadus ne’e inklui mós atividade resensiamentu eleitorál no atualizasaun baze dadus iha sub-rejiaun tolu, la inklui Oésilo tanba ekipamentu foin to’o iha semana kotuk,” Diretora STAE-RAEOA, Luíza da Costa, informa ba Agência TATOLI iha Palaban, Oé-Cusse, segunda ne’e.

Nune’e ekipa kontinua serbisu iha baze desde fulan-jullu to’o agora no STAE-RAOEA garante to’o dezembru dadus ne’e sei sa’e tanba serbisu resensiamentu baze dadus sei la’o hela iha sub-rejiaun Pássabe, Nítibe no Pante Makassar.

Daudaun ne’e ekipa STAE kontinua halo preparasaun atu identifika fatin izoladu ne’ebé presiza tau atensaun hanesan asesu estrada no liña eletrisidade, nomoos rejista fasilidade sentru votasaun foun estasaun votasaun, nune’e prepara ba eleisaun prezidensiál 2022 no eleisaun parlamentár 2023.

“STAE preparadu ba eleisaun períodu 2022, ita-nia ekipa sira rejista sentru votasaun foun 19, tanba iha anteriór hamutuk 41 agora sa’e ba 60, no estasaun votasaun uluk 65 agora rejista foun 23 hamutuk 88,” nia katak.

Purtantu, totál eleitór provizóriu iha Rejiaun Administrativa Espesiál Oé-Cusse Ambeno hamutuk 50.293 komposta hosi mane 25.655 no feto 24.638.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here