Prezidente Crédit Union Fatuk-Merin Unidade Manutai no Xefe Suku Maucasa, Aileu, Juliana Imaculada, tara tais ba Sekretáriu Estadu Kooperativa (SECoop) Elizário Ferreira. Imajen Tatoli/ Arminda Fonseca.

AILEU, 15 janeiru 2022 (TATOLI)—Sekretáriu Estadu Kooperativa (SECoop, sigla portugés), Elizário Ferreira, husu membru Kooperativa Credit Union Fatuk-Merin Unidade Manutai “CU-FATUMA” no komunidade suku Manukasa, postu administrativu Lequidoe munisípiu Aileu, tenke investe makaas hodi kuda fali sabraka.

Notísia Relevante: SECoop fó pose ba estrutura kooperativa kréditu CU-FATUMA

“Ha’u husu ba komunidade no kooperativa CU-FATUMA tenke kuda barak sabraka tanba tempu avó sira-nian estrada ibun nakonu ho sabraka, maibé tempu ukun an ita kontinua ku’u de’it buat sira-ne’ebé bei’ala husik mai ita maibé ita rasik atu kuda ne’e menus. Tanba ne’e, husu atu kuda fila-fali sabraka,” Elizário Ferreira hateten iha Sede Suku, Manukasa, Aileu, sábadu ne’e.

Iha tempu uluk, postu administrativu Lequidoe koñesidu ho sabraka tanba ne’e agora tenke haburas fali Lequidoe hodu kuda sabraka, nune’e bele fó jardin ne’ebé furak ba kada família no liuliu rai Lequidoe.

“Tanba bainhira ita kuda la’ós atu haburas de’it rai, maibé fó mós rendimentu di’ak ba kada família. Tanba bainhira fuan ita-boot sira sei lori ba faan iha merkadu nasionál hodi faan, tanba ai-fuan nia vitamina di’ak ba ema-nia saúde,” nia dehan.

Se komunidade Lequidoe atu kuda sabraka mak laiha, dehan ba SECoop promove kuda sabraka nune’e bainhira kada família ida kuda sabraka hun-100, SECoop sei fó osan $10,00 kada fulan nune’e badinas kuidadu.

“Ha’u husu ba líder lokál, kuda sabraka haburas Lequidoe tenke sai programa ida, nune’e ba oin Lequidoe nakonu fali ho sabraka. Maibé mós labele kuda de’it sabaraka maibé mós kuda modo-tahan sira seluk, nune’e ita-boot sira bele hetan rendimentu di’ak hodi sustenta família,” nia hateten.

Administradór Lequidoe, munisípiu Aileu, Luis Damião hateten nia-parte ba oin sei servisu hamutuk ho lideransa komunitáriu sira halo sensibilizasaun ba komunidade, nune’e hotu-hotu aleinde kuda modo iha hanoin kuda mós sabraka.

“Agora daudaun ne’e ita-nia komunidade kuda maibé to’os laran de’it, atu kuda fali hanesan uluk iha estrda ibun sira-ne’e mak laiha. Ne’ebé, ba oin, ita sei halo sensibilizasaun nune’e komunidade ida-idak bele kuda sabraka iha uma ohin ka estada ibun,” nia dehan.

Xefe Suku Maukasa, Aileu, Juliana Imaculada. Imajen Tatoli/Arminda Fonseca.

Xefe suku Maukasa no hanesan Prezidente Kooperativa CU-FATUMA, Juliansa Imaculada hateten, nia parte hanesan xefe suku ba oin sei tau atensaun ba asuntu kuda sabraka refere, maibé prsiza mós hetan informasaun ruma nune’e bainhira kuda sabraka iha rezultadu.

“Durante ne’e ami kuda. Maske labarak liu, maibé kuda moris hotu sabraka sira-ne’e mate hosi nian tutun mak tun fali ba nia hun tanba buat ida peste mak halo. Tanba ne’e, ba oin atu kuda fali presiza hetan formasaun,” nia dehan.

Jornalista : Arminda Fonseca

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here