Autoridade RAEOA komemora loron nasionál florestál iha Nitibe. Imajen/mídia agrikultura.

DILI, 13 janeiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Agrikultura, daudaun ne’e distribui ona ai-oan rihun-18 hodi refloresta bee-matan 114 ho área konservasaun hamutuk ektare 100,80 iha rejiaun ne’e.

Sekretáriu Rejionál ba Asuntu Agrikultura, José Eta, informa, asuntu ne’e iha selebrasaun loron nasionál reflorestasaun ne’ebé autoridade selebra iha bee-matan Oélpam, aldeia Hau-Ufe, suku Lela-Ufe, sub-rejiaun Nítibe, ho nárea konservasaun hamutuk ektare haat (4), hodi kuda ai-oan hamutuk 420.

“Ita-nia esperansa ba futuru maka refloresta ita-nia rejiaun, tán ne’e ita konserva bee-matan sira 114 ho área konservasaun ektare 100,80, ita kuda ona ai-oan hamutuk rihun 18, ne’ebé durante ne’e autoridade konserva liuhosi programa food for work, realiza ba iha sub-rejiaun haat,” José Eta, ko’alia iha suku Lela-Ufe, kinta ne’e.

Nia fó-sai katak, espésie ai-oan ne’ebé autoridade distribui ona iha inísiu dezembru 2021 hamutuk 23, hanesan abokate, sabraka, samtuku, bua, au, rambutan, dragon, kamí, kakau, vetiver, grass, mahoni, jambu, hali-portu, figus, ai-kameli, ai-nitas, kulu-jaka, malus, nimba no nú.

Nia espera iha futuru sei aumenta númeru ai-laran iha Oé-Cusse, tanba bazea rezultadu peskiza hosi Governu Sentrál liuhosi diresaun nasionál floresta no dezenolvimentu ekonomia turizmu, iha 2011-2012 hatudu katak, númeru ai-laran mínimu liu iha Timor-Leste primeiru maka Oé-Cusse.

“Tán ne’e ita hahú hosi tinan kotuk, ita halo ona konservasaun ba área protejida sira, bee-matan sira, hodi kuda nune’e ita bele responde rezultadu peskiza ne’e iha tinan hirak tuir mai,” nia katak.

Entretantu, Xefe suku Lela-Ufe, José Neno Sila, agradese ba autoridade RAEOA, tanba tinan ne’e selebra loron nasionál reflorestasaun iha suku Lela-Ufe, tanba iha suku refere iha bee-matan-10 mai sai alvu iha polítika konservasaun iha programa food for work.

Notisia relevante: RAEOA prepara ai-oan rihun 66

Jornalista         : Abílio Elo Nini
Editór               : Evaristo Soares Martins

PUBLISIDADEiklan