Sekretáriu Rejionál ba Asuntu Agrikultura, José Eta. Imajen Agência TATOLI/Abílio Elo Nini.

OÉ-CUSSE, 25 outubru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Agrikultura, prepara ona ai-oan rihun 66 atu kuda iha bee-matan 85 iha rejiaun refere.

Programa ne’e liuhosi Food for Work foka liubá konservasaun no protesaun ba bee-matan sira iha rejiaun Oé-Cusse.

“Iha faze primeiru identifika bee-matan 58 ho ektare 100,14, no faze daruak hamutuk bee-matan 27 ho ektare 30, nune’e autoridade mós prepara ona ai-oan hamutuk rihun-66 ho espésie 22 atu kuda iha bee-matan hirak-ne’e,” Sekretáriu Rejionál ba Asuntu Agrikultura, José Eta informa ba Agência TATOLI, iha Oé-Cusse, segunda ne’e.

Objetivu hosi hosi kuda ai-oan hirak-ne’e atu garante kualidade débitu bee nian, tanba durante ne’e agrikultór sira seidauk iha konsiénsia tanba tá ai-arbiru, nune’e maka autotridade RAEOA kria polítika liuhosi programa Food for Work atu konserva bee-matan sira nune’e labele akontese krize bee-moos.

Nia fó-sai katak, ai-oan rihun 66 daudaun ne’e prepara ona iha sentru viveru diresaun agrikultura nian, balu prepara hosi parseiru sira hanesan UNDP, ONG CECEO, no ai-oan hirak-ne’e sei distribui ba bee-matan sira hotu ne’ebé autoridade identifka ona.

Nia hatutan, planu atu halo distribuisaun ba ai-oan hirak-ne’e, depende ba medida idak-idak, balu luan liu nia kuantidade ektare barak, entaun área konservasaun mós kiik, nune’e sei distribui bazea ba medida.

“Ita sei distribui ai-oan sira-ne’e bainhira udan monu-rai, nune’e bele hetan malirin, no daudaun ne’e agrikultór sira preparadu ona hanesan halo lutu haleu ba bee-matan sira, ke’e ai-oan nia fatin ka terasu ne’e finaliza ona, hein de’it udan monu-rai ekipa tékniku sira distribui kedas,” nia esplika.

Entretantu totál ai-oan rihun 66 ne’e kompostu hosi espesié 22 maka hanesan, abokate, sabraka, samtuku, bua, au, rambutan, dragon, kamí, kakau, vetiver grass, mahoni, jambu, hali-portu, figus, ai-kameli, ai-nitas, kulu-jaka, malus, nimba no nú.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here