Ai-Kameli ne'ebé kuda hosi eis Prezidente Repúblika Indonézia, Susilo Bambang Yudhoyono, iha loron 26 Agostu tinan 2014. Iha Palasiu Governu, kinta (13/01). Imajen Tatoli/Francisco Sony

DILI, 13 janeiru 2022 (TATOLI)–Ministériu Agrikultura no Peska (MAP) liuhosi Diresaun Jerál Floresta, Kafé no Planta, hahú hosi tinan 2005 to’o 2021 konsege kuda ai-kameli iha rai ektare 300.

“Fatin sira ne’ebé kuda ai-kameli mak hanesan Covalima, Liquiçá, Ainaro no Manatuto inklui ba munisípiu seluk,” Diretór Jerál Floresta, Kafé Planta Industria, Raimundo Mau, hateten ba Agência TATOLI, iha ninia knaar fatin, kinta ne’e.

Enkuantu, iha fatin ne’ebé MAP halo intervensaun hanesan iha Zumalai no Tilomar iha munisípiu Covalima iha rai ektare neen, ne’ebé iha tinan 2005 to’o agora halo espansaun tan ba ektare 20.

“Ai-horis ne’e moris di’ak no presiza halo tratamentu espesiál, maibé bainhira la fó atensaun di’ak, bele hetan atake hosi peste ka ai-horis sira ne’ebé moris besik. Programa investimentu ne’ebé hahú iha tinan 2017, Governu hahú produsaun iha área Manduki, Atabae no iha rai ektare 200 ho kondisaun di’ak tebes,” nia akresenta.

Notísia relevante: MAP sei selebra loron nasionál floresta no ai-kameli iha Manatuto

Nune’e, iha mós individuu balun ne’ebé kuda ai-kameli lima, ne’ebé bainhira halo estimasaun to’o tinan 20 ba oin, plantasaun iha rai ektare 1.000 prontu atu kolleta.

Aleinde ne’e, haree ba presu ai-kameli bazeia ba merkadu internasionál, presu ba kada kilograma $80 to’o $100, ne’ebé sei lori rendimentu ekonomia di’ak ba entidade sira ne’ebé hahú investe.

“Ita iha planu ona atu lori ai-kameli sira mai kuda iha área urbana,” nia dehan.

Inisiativa kuda ai-kameli bazeia ba programa Prezidente Repúblika, ne’ebé uma-kain ida ai-hun ida, nune’e MAP sei kontinua programa ne’e iha munisípiu sira.

“Ai-kameli sira ne’e hun ida ita gasta $0,50, maibé bainhira ita prodús sei hetan milliaun $1,” nia tenik.

Iha prosesu produsaun ai-kameli hun ida nia fini, MAP prepara iha sentru viveiru permanente iha Maubara, Liquiçá, ne’ebé prodús hamutuk 300.000 no prodús tan 80.000 iha viveiru permentante tolu iha Viqueque, Manufahi no Lautém.

“Entaun bainhira soma hamutuk, tinan 2021 iha ai-horis millaun 1,2 ho espesie 20 no halo  produsaun planta indústria hanesan mahon ba kafe, baunilla, kaijus, kakau, ne’ebé sentraliza iha sentru plantasaun viveiru Fatukero, munisípiu Ermera ne’ebé prontu ona hein atu distribui ba programa MAP rasik,” Diretór tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here