DILI,13 janeiru 2022 (TATOLI)—Divisaun Fundu Globál, Ministériu Saúde no Servisu Autónomu Medikamentu no Ekipamentu Saúde (SAMES) selebra akordu tékniku hodi instala sistema eletróniku mSupply hodi kontrolu farmaséutiku iha postu saúde iha munisípiu Manatuto no Bobonaro.
Administrador Divisaun Fundu Globál iha Ministériu Saúde, Noé Gaspar Pinto Silva, hateten objetivu akordu ne’e atu reforsa sistema eletróniku hodi fornese informasaun hosi miunisípiu mai iha nivél nasionál.
Espansaun sistema mSupply ne’e apoia hosi Departamentu Negósiu Estranjeiru no Komérsiu (DFAT,sigla inglés) no Fundu Populasaun Nasaun Unida (UNFPA,sigla inglés) hodi instala sistema eletróniku ne’e ba sentru saúde 27 iha munisípiu sira no instituisaun Estadu.
“Ita nia akordu ne’e atu instala fali iha Manatuto no Bobonaro liuliu iha postu saúde sira, nune’e ita haree nia efikásia no efisénsia hodi utiliza mSupply hodi fornese informasaun ba sentrál ne’e sai diak liután. Hanesan pasu importante tebes Divisaun Fundu Globál iha parseria ida ne’e atu haforsa sistema saúde eletronika la’o ho diak,”Administrador Noé Gaspar, hateten ba jornalista sira hafoin asina akordu tékniku ne’e iha edefísiu SAMES-Kampu-Alor, kinta ne’e.
Sistema ne’e resilénsia atu reforsa sistema saúde nian hodi apoia iha sistema fornesimentu informasaun saúde no mós reforsa iha Laboratáoriu Nasionál Saúde nian.
“Iha SAMES ami investe kuaze orsamentu rihun $500-resin liuliu oinsá atu haree ba sistema armazeneamentu nian reforsa ekipamentuaramazein no apoiu lojístika sira no rekursu umanu sira atu reforsa SAMES nia sistema iha distribuisaun no jesttaun armazeneamentu hodi fornese servisu diak ba ita- nia sosiedade,” nia akresenta.
Iha fatin hanesan, Diretór Ezekutivu SAMES, Santana Martins, hateten akordu tékniku ho Divisaun Fundu Globál ba faze datoluk ne’ebé espesifika liu ba asuntu jestaun armazeneamentu.
“Dahuluk mak jestaun informasaun farmasíutika ne’ebé mak tuir orientasaun husi Governu da-ualu nian kona-ba asegura dadus no estoke ne’ebé mak di’ak tantu husi nivél armazein sentrál to’o iha nivél postu saúde sira tanba sira hanesan utilizadór,” Diretór Ezekutivu ne’e afirma.
Ministra Saúde orienta ona hafoin instalasaun kontinua tau matan atu iha sustentabilidade no kompeténsia ba Diresaun Nasionál Farmasia no Medikamentu.
“Ho akordu ida ne’e ita sei kompleta tan iha munisípiu rua Bobonaro no Manatuto ne’ebé mak iha postu saúde hamutuk 54 no espera katak iha futuru to’o iha postu saúde sira seluk iha teritoriu nasionál atu asegura katak sistema informasaun farmasíutika liuliu bele kontrola estoke aimoruk sira iha postu saúde no sentru saúde iha munisípiu sira,” nia garante.
Jornalista : Felicidade Ximenes
Editór : Florencio Miranda Ximenes
