Diretór DTT Munisípiu Bobonaro, José Paulo Henrique Baptista.

BOBONARO, 13 janeiru 2022 (TATOLI) – Diresaun Transporte no Terrestre (DTT) Munisípiu Bobonaro, hahú hosi fulan-janeiru to’o dezembru tinan 2021, konsege rekolla reseita $19,740.00 hosi atendimentu ezame karta kondusaun.

“Ami rekolla reseita sira hosi ema-ne’ebé mai tuir ezame karta kondusaun liuhosi atendimentu kada loron ba komunidade sira-ne’ebé uza transporte, hanesan motorizada boot no kiik, karreta kamioneta nomoos karreta kiik. Hosi ema sira-ne’e mak tinan kotuk ita hatama reseita ba kofre estadu hamutuk $19,740,” Diretór Transporte no Terrestre Munisípiu Bobonaro, José Paulo Henrique Baptista informa Agência Tatoli liuhosi telefónika kinta ne’e.

Nia esplika, reseita hirak-ne’e rekolla hosi komunidade sira iha postu administrativu neen iha munisípiu Bobonaro inklui mos komunidade munisípiu Covalima no Ermera ne’ebé hela besik ho totál ema na’in-216.

Diretór ne’e haktuir, maske durante ne’e komunidade sira iha área rurál barak mak kontribui reseita  hosi karta kondusaun, maibe to’o agora seidauk bele halo ezame iha nível postu adminstrativu tanba limitasaun rekursu umanu no fasilidade transporte operasionál.

Problema transporte difikulta mós ba ekipa sira atu tún ba terrenu halo rekollamentu dadus komunidade hirak mak to’o oras ne’e seidauk hetan karta kondusaun no halo manutensaun ba sinál tránzitu sira-ne’ebé hetan estragu.

“Ami iha planu duni atu halo ezame ne’e ba to’o iha postu administrativu sira, ami bele responde bazea ba pedidiu balu, maibé ami mós tenke sukat, tanba atendimentu kada loron iha edifísiu mós ami haree seidauk sufisiente, ita iha de’it funsionáriu permanente na’in-hitu no funsionáriu kazuál na’in-lima de’it, ne’ebé ami labele atende serbisu sira-ne’e hotu, maibé ami preparadu atende nafatin ita-nia komunidade,” nia esplika.

Diretór ne’e nafatin husu ba komunidade sira-ne’ebé uza transporte tantu privadu no públiku ne’ebé sirkula iha munisípiu Bobonaro, liuliu iha suku sira atu nafatin iha vontade mai tuir teste ezame direita iha edifísiu, tanba funsionáriu sira nafatin preparadu halo atendimentu iha oras serbisu.

“Sira-ne’ebé hela dook bele mai importante liu mak kumpri prosedimentu sira-ne’ebé iha, bainhira ezame mak la liu bele kompleta ezame ne’ebé seidauk halo hotu, sira selu ona mak la liu dala-tolu ita bele prosesa sira-nia kartaun provizóriu, depois aban bainrua mak bele kompleta ba permanente,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here