Diretór Servisu Ministériu Agrikultór no Peska (MAP) Viqueque, Carlos Pinto. Imajen TATOLI/Vitorino Lopes da Costa

DILI, 12 janeiru 2022 (TATOLI)–Servisu Ministériu Agrikultura no Peska (MAP) munisípiu Viqueque sei kuda ai-kameli oan iha área Raitahu, suku Uma-uain kraik, postu Viqueque villa, munisípiu Viqueque.

“Tuir planu, kinta ne’e ami sei kuda ai-kameli hamutuk hun 556.000 ne’ebé okupa rai ektare balun. Programa ne’e MAP nian no ita halo lansamentu kuda ba rai Estadu lokaliza iha Raitahu,” Diretór Servisu MAP Viqueque, Carlos Pinto, hateten ba Agência TATOLI, via telefónika, kuarta ne’e.

Notísia relevante: MAP sei selebra loron nasionál floresta no ai-kameli iha Manatuto

Ai-kameli moris hosi tinan 10 to’o 20 mak bele halo kolleta, tanba ne’e MAP kuda iha Raitahu hodi funsionáriu Diresaun Florestál bele halo kontrolu to’o kolleta.

“Ita hakarak ai-kameli moris ho di’ak, presiza koloka funsionáriu hodi kuida no kontrola,” nia akresenta.

Daudaun ai-kameli oan iha munisípiu Viqueque iha sentru viveiru iha postu Uatucarbau hamutuk hun 500.

“Tuir dadus ai-kameli iha munisípiu Viqueque hamutuk hun 2.500, ne’ebé partense ba Estadu. Maibé komunidade mós kuda, ami seidauk identifika loloos dadus ai-kameli ne’ebé komunidade kuda no ai-kameli tuan mós iha,” nia dehan.

Daudaun presu ai-kameli tuir merkadu globál kada kilograma hamutuk $250.

“Presu nasionál seidauk hatene, maibé ninia presu di’ak tebes, tanba ne’e MAP prepara ai-kameli oan karik komunidade presiza kuda bele mai edifísiu MAP. Tanba daudaun tempu udan, ha’u husu ba komunidade Viqueque, ba hirak ne’ebé interese kuda ai-kameli oan, aban ita halo lansamentu kuda ai-kameli atu selebra loron ai-kameli, komunidade bele hatama pedidu mai MAP Viqueque hodi hetan ai-kameli oan, hodi aproveita kuda iha kintál laran,” nia tenik.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here