Komandante Polísia Nasionál Timor-Leste (PNTL), Komisáriu Faustino da Costa, lidera reuniaun alargada ho Komandante Munisípiu Aileu, Ainaro, Manufahi no Ermera. Imajen TATOLI/Natalino Costa.

ERMERA,11 janeiru 2022 (TATOLI)—   Komandu Polísia Nasionál Timor-Leste (PNTL) realiza reuniaun alargada ho Komandu Munsípiu sira hodi diskute estratéjia asegura seguransa ba kampaña no eleisaun prezidensiál. 

Iha enkontru alargada dahuluk ne’e, lidera direta hosi Komandante Polísia Nasionál Timor-Leste (PNTL), Komisáriu Faustino da Costa, ho Komandante Munisípiu Aileu, Ainaro, Manufahi no Ermera hodi rona preparasaun no difikuldade ne’ebé hasoru iha tereñu.

“Ohin, Komandu Jerál realiza enkontru alargada ho komandu munisípiu sira hodi bele hatene sira nian preparativu no difikuldade ne’ebé enfreta hodi hadi’a, atu asegura kampaña no eleisaun prezidensiál,” Komandante Operasaun Nasionál Komandu Jerál PNTL, Superintendente Xefe Polísia, Pedro Belo, informa ba jornalista iha Komandu Munisípiu Ermera, tersa ne’e.

Tanba, tempu badak Prezidente Repúblika sei dekreta data eleisaun prezidensiál, ne’ebé sei iha atividade kampaña eleitorál hosi kandidatu ba Prezidente Repúblika-sira.

Nune’e, Komandante Pedro Belo dehan, komandu PNTL hakarak rona difikuldade hirak ne’e hodi resolve liuhosi Orsamentu tinan fiskál 2022.

Orsamentu PNTL iha tinan fiskál 2022 hamutuk $34,082, 481.  Hosi totál orsamentu ne’e aloka ba salariu no vensimentu $17,709,509, bens no servisu $14,712,472 no kapitál menor, $1,660,500.

“Ita hakarak uza orsamentu ne’ebé mak iha hodi fasilita komandu munisípiu sira hodi bele hala’o sira nian servisu ho di’ak liuliu asegura festa demokrasia ne’e,” nia akresenta.

Komandu PNTL rejista preokupasaun, komandu munisípiu sira hanesan rádiu komunikasaun, transporte balun, no fasilidade sira balun ne’ebé hahú aat ona.

Kona-ba estratéjia PNTL hasoru eleisaun prezisidensiál, Superintendente Xefe Polísia ne’e dehan, ne’e segredu Komandu nian, maibé komandu PNTL liuhosi diretiva Komandante Jerál PNTL nian klaru mantein seguransa ba sosiedade.

Komandu PNTL mós husu ba membru PNTL sira atu serbisu imparsiál no independente, labele envolve-aan ba partidu ka a-favor ba kandidatura balun nune’e bele fó susesu ba eleisaun prezidensiál ho la’o di’ak.

Iha biban hanesan, Komandante PNTL munisípiu Ermera, Superintendente Polísia, Rogerio Lay, informa, PNTL Ermera preparadu atu asegura kampaña no eleisaun prezidensiál.

“Komandu Munisipiu Ermera iha karreta 13, ne’ebé karreta lima mak kondisaun sei di’ak no ualu kondisaun ladun di’ak, tanba ne’e difikulta serbisu membru sira atu halo serbisu diária,” Komandante ne’e prokupa.

Kona-ba motorizada hamutuk 29, hosi númeru ne’e motór 19 mak kondisaun di’ak no 10 avaria ona inklui motorizada ba Ofisiál suku (OPS) iha 49 ho kondisaun di’ak hotu.

“Ha’u husu komandu Jerál PNTL tenke tau konsiderasaun ba kestaun sira ne’e iha tempu badak nia laran, tanba atu fó seguransa ba eleisaun prezidensiál ho di’ak ne’e presiza apoia másimu hosi transporte no seluk tan,” Komandante ne’e sujere.

Tuir ajenda, Komandante Jerál sei konvoka enkontru ho Komandante munisípiu sira, hanesan Baucau, Viqueque, Lautém, Liquiça, Bobonaro no Rejiaun Administrativu Espesiál Oé-cusse Ambeno (RAEOA), nune’e mós komandante kompañia sira hotu atu prepara estratéjia ba asegura eventu demokrátiku ne’e.

Jornalista:  Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here