Komunidade sira nebe hela besik iha mota ibun area Bebonuk la iha konsensia hodi soe fali Lixu ba iha mota Komoro, Dili 13 Febreiru 2020.Imajen/Antonio Goncalves

DILI, 11 janeiru 2021 (TATOLI) –  VIII Governu Konstitusionál husu komunidade hotu kontribui hamoos lixu tanba ikus-ikus númeru kazu dengue sa’e maka’as iha kapitál Dili.

“Governu haka’as-aan atu halo serbisu ba ida-ne’e, maibé husu mós ba komunidade sira atu koopera, labele soe fo’er arbiru, hare fatin lixu, labele soe tún sa’e iha fatin-fatin hanesan iha tasi-ibun, soe iha mota mak tún ba fali tasi, ida-ne’e ladún di’ak,” Ministru ba Asuntu Parlamentár no Komunikasaun Sosiál, Francisco Martins da Costa Pereira Jerónimo,informa ba jornalista sira iha uma fukun, tersa ne’e.

Nia dehan, iha tinan ne’e governu esforsu halo jestaun di’ak atu redúz lixu ne’ebé soe lekar iha fatin públiku sira iha kapitál nasaun, nune’e labele fó efeitu negativu ba komunidade sira-nia saúde no estraga meiu ambiente.

Sekretáriu Estadu Ambiente, Demétrio do Amaral de Carvalho, hateten, problema lixu governu mesak labele kombate, maibé presiza kontribuisaun komunidade no família hotu hamoos ezgotu sira iha uma ninin, nune’e labele fó oportunidade ba susuk atu tolun iha ambiente uma oin.

Sekertáriu Estadu Ambiente, Demétrio do Amaral de Carvalho. Imajen TATOLI/Francisco Sony

“Ita mak tenke amigável ho ambiente, ita venena ita-nia ambiente, ita hafo’er ita-nia ambiente no ita-nia ambiente fó kutun sira  halo ita kabun moras, halo ita fani liuhosi susuk bele halo dengue ho malária kona ita,” nia hateten iha Timor Plaza.

Entretantu tuir dadus estatístika Ministeriu Saúde liuhosi diresaun nasionál saúde públika, departamentu vijílansia epidemiolojia iha semana dahuluk loron 9 fulan ne’e rejista kazu dengue iha teritoriu nasionál hamutuk 174 no hosi númeru ne’e mate na’in-ida.

Kazu ne’e maioria iha munisípiu Dili ho totál 158, tuir fali munisípiu Manututo ho kazu neen, Covalima kazu lima, Viquque kazu tolu no munisípiu Bobonaro rejista kazu ida.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here