Segundu Komandante PNTL Munisípiu Baucau, Superintendente Asistente José Casemero. Imajen Tatoli/Natalino Belo.

DILI, 11 dezembru 2021 (TATOLI) – Asidente tráfegu akontese iha suku Bucoli, postu administrative Baucau Vila, munisípiu Baucau, rezulta pasajeiru na’in-10 kanek.

Pasajeiru na’in10 ne’e transporta ho karreta marka carry ho xapa-matríkula 38-742 diresaun munisípiu Lautém-Dili hetan asidente iha suku Bucoli, postu admistrativu Baucau Vila, rezulta pasajeiru na’in-10 kanek hosi pasajeiru na’in-15.

Segundu komandante Polísia Nasionál Timor-Leste Munisípiu Baucau, Superintendente Asistente José Casemero, esplika, asidente refere akontese iha oras 03:50 dadeersan bainhira karreta refere hosi diresaun postu administrativu Iliomar, munisípiu Lautém transporta pasajeiru hamutuk na’in-15 atu mai Dili.

Hosi asidente ne’e rezulta pasajeiru na’in-10 mak kanek kompostu hosi na’in-neen kanek kmaan no na’in-haat kanek grave.

“Hafoin simu informasaun, PNTL direitamente halo kedas atendimentu no vitíma sira-ne’e evakua kedas mai Hospital Rejionál Eduardo Ximenes (HorEX),” Superintendente Asistente ko’alia iha Baucau, tersa ne’e.

Kauza hosi akontesimentu refere mosu tanba motorista halai ho velosisade másimu nune’e parte diresaun tránzitu PNTL Baucau asegura ona evidénsia inklui motorista rasik iha komandu Baucau atu kontinua ba prosesu investigasaun.

Informasaun ne’ebé rekolla mak motorista soke besi hodi rezulta kareta baku-fila tanba kareta nia diresaun atu ba Dili to’o fila kotuk ba diresaun Baucau.

“Sira arranka hosi Lospalos oras 09:00 kalan tuir dalan deskansa dala-tolu nune’e deskonfia velosisade aas depois provoka hosi motorista matan dukur,” José informa.

Jornalista            : Natalino Belo

Editór                   : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here