Xefe Suku Bemori, Cristalina Perira Soares de Oliveira. Imajen Tatoli/Nelia Fernandes.

DILI, 10 janeiru 2022 (TATOLI)—Autoridade Lokál liuhosi Xefe Suku Bemori, Cristalina Perira Soares de Oliveira, husu Governu atu aplika lei no autoriza loja Xineza nia na’in sira iha sidade Dili atu soe lixu diretamente iha lixeiru Tibar.

Notísia RelevanteAMD sei koloka kaixote lixu 4000 iha sidade Dili

Joven ida deskansa hela hafoin halo aktividade hili sasán uzadu hanesan kalen no besi-aat sira ne’ebé soe iha lixeiru Tibar, sesta (5 /2/2021). Imajen Tatoli/Antonio Goncalves.

“Kona-ba lixu iha suku Bemori la’o normál maibé dala ruma komunidade balun hosi fatin seluk ho karreta mak mai soe foer iha ne’e, liu-liu ba loja boot xineza sira. Tanba ne’e, ha’u husu atu Governu aplika lei ruma ba sira atu sira soe foer diretamente ba iha Tibar, tanba sira labele soe foer ka kaixa sira mai hotu fatin ne’ebé komunidade sira atu soe foer bá. Tanba ne’e, husu Governu, liuhosi Munisípiu Dili atu hatun netik karta ruma mai iha loja sira atu sira soe foer ba iha lixeiru Tibar,” Cristalina Perira Soares de Oliveira hateten ba Agência Tatoli, iha nia knaar fatin, Bemori, Dili, segunda ne’e.

Tuir nia, maske iha ona dekretu-lei númeru 26/2012 no diploma Governu númeru 32/2017 konabá jestaun lixu ne’ebé regula komunidade atu soe lixu, maibé komunidade sei kontinua soe foer arbiru.

Tanba ne’e, nia husu Governu atu lei ida-ne’ebé rigorozu tebes atu populasaun ne’ebé soe foer arbiru tenke soe foer iha nia fatin, no komunidade ne’ebé soe foer arbiru iha sidade Dili nia laran ne’e Governu tenke aplika sansaun ruma atu sira tauk no labele soe lixu arbiru.

Nu’udar xefe suku Bemori, nia hamutuk ho xefe aldeia no xefe juventude sira sempre avizu ba komunidade suku Bemori nian atu so’e foer iha nia fatin, maibé ida-ne’e filafali ba komunidade ida-idak ninia konsiénsia atu soe lixu iha nia fatin.

“Ita labele ba obriga sira tenke halo maibé ida-ne’e ba ema hotu nia saúde, entaun sira tenke halo tanba lixu ne’e ligadu ho moras dengue ne’ebé agora daudaun sae makaas. Entaun, itania munisípiu Dili no Postu mós sempre bolu ami enkontru, atu ami fó hanoin ba komunidade atu soe foer iha nia fatin,” nia dehan.

Notísia RelevanteXefe Suku Bemori husu Governu reativa PMOPA hodi halo limpeza

Jornalista : Nelia Fernandes

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here