Evolusaun susuk aedes aegypti. Imajen/Espesiál

DILI, 10 janeiru 2022 (TATOLI)—Reprezentante Xefe Departamentu Saneamentu Munisípiu Dili, Tomás Albert Braz, informa atu kombate moras dengue iha munisípiu Dili, Autoridade Munisípiu Dili orienta ona xefe suku sira halo oráriu no hala’o limpeza jerál iha aldeia kada sesta-feira.

Notísia Relevante: Semana dahuluk, MS rejista kazu dengue 174 no óbitu na’in-ida

“Iha enkontru kinta semana kotuk, itania Sekretariadu Prezidente Autoridade Munisípiu Dili, António Moniz Clau fó ona orientasaun ba Xefe Suku sira atu halo oráriu limpeza jerál, nune’e bele orienta xefe aldeia sira atu iha kada sesta-feira hamutuk ho komunidade halo limpeza jerál, no oráriu ne’e tenke hato’o mai iha munisípiu Dili atu mobiliza karreta atu ba rekolla lixu,” Tomás Albert Braz hateten ba Agência Tatoli, iha nia knaarfatin, Matadouru, Dili, segunda ne’e.

Iha atividade limpeza jerál ne’e autoridade lokál hamutuk ho komunidade sira sei halo limpeza jerál iha aldeia sira, liu-liu ba fatin ka área ne’ebé afeta makaas ba moras dengue.

Maibé, nia dehan, antes atu hala’o atividade limpeza jerál ne’e xefe suku sira tenke haruka oráriu mai iha munisípiu Dili atu iha koñesimentu katak iha loron sesta ne’e halo limpeza iha aldeia ida-ne’ebé no liu-liu husu atu halo limpeza iha aldeia ne’ebé afeta makaas ba moras dengue.

Xefe Suku Bemori, Cristalina Perira Soares de Oliveira, hateten nia parte koopera ona ho administradora Na’in Feto hodi halo oráriu limpeza jerál iha suku hodi hala’o limpeja iha kada aldeia.

“Ami koopera ho aminia Administradora Na’in Feto, ami iha ona programa atu iha fulanfulan ami iha estrutura suku neen (6) hamutuk ho administradór postu administrativu atu tun ba iha fatin ne’ebé afetadu ba moras dengue ka fatin ne’ebé foer duni, atu ita hamutuk ho komunidade halo limpeza jerál ne’ebé ami sei hala’o iha janeiru mia laran ne’e,” nia informa.

Tanba ne’e, iha Suku Bemori nia atividade limpeza jerál sei hala’o iha 11 fevereiru 2022 iha aldeia sentru.

“Ami halo limpeza jerál uluk iha aldeia sentru, tanba iha aldeia ne’ebá hetan moras dengue no ema ida mate ona, tanba moras ne’e,” nia informa.

Nune’e, tuir dadus hosi Xefe Suku Bemori haktuir katak daudaun ne’e komunidade ne’ebé hela iha Suku Bemori hamutuk 4.859 ne’ebé hela iha suku neen ne’ebé pertense ba suku Bemori daudaun ne’e.

Entretantu, tuir informasaun ne’ebé Agência Tatoli asesu katak suku neen (6) ne’ebé sei hala’o atividade limpeza jerál hanesan suku Akadiruhun sei hala’o limpeza jerál iha loron 14 janeiru 2022, suku Gricenfor sei hala’o iha 21 janeiru 2022, suku Lahane Orientál sei hala’o iha 28 janeiru 01 2022, suku Santa Crúz sei hala’o iha 04 fevereiru 2022, suku Bemori sei hala’o iha 11 fevereiru 2022 no suku Bidau Lecidere sei hala’o iha 18 fevereiru 2022.

Notísia Relevante: PN husu Minsitériu Saúde tau atensaun ba moras dengue

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here