Inspetór Jerál Jogu, Domingos da Costa Guterres. Imajen TATOLI/Francisco Sony

DILI, 10 janeiru 2021 (TATOLI)—Ministériu Turizmu Komérsiu Indústria (MTKI), liuhosi Diresaun Inspesaun Jerál Jogu (IGJ, sigla portugés) iha tinan 2021, rekolla reseita jogu legál ba kofre Estadu hamutuk millaun $1,7.

“Rezultadu inspesaun ba grupu jogu legál iha munisípiu 12 inklui Rejiaun Administrativa Espesiál Oé-cusse Ambeno, iha tinan 2021 konsege rekolla reseita ba konfre Estadu hamutuk $1.782.515,47,” Inspetór Jerál IGJ, Domingos da Costa Guterres, hateten, iha ninia knaar fatin, Bebora, segunda ne’e.

Nune’e, Inspetór Jerál konsidera, atividade ne’ebé IGJ halo hanesan parte ida ne’ebé konsege konkista reseita.

“Inspesaun Jogu ne’ebé ami hala’o ne’e tutela ba MTKI, ne’ebé ami-nia knaar mak oinsá halo kontrolu no monitoriza atividade jogu iha territóriu tomak, tantu modernu no tradsionál,” nia akresenta.

Aleinde ne’e, IGJ ninia funsaun atu halo balansu empregu iha Timor-Leste, tantu feto no mane, ne’ebé operadór sira tenke tau atensaun ba traballadór sira.

Durante halo inspesaun, konsege hetan jogu ilegál rua hanesan toto bola iha Covalima, Suai ne’ebé ekipa tun terrenu no halo buska, enkuantu seluk mak slot machine iha Baucau, ne’ebé Polísia Nasionál Timor-Leste (PNTL) no Polísia Nasionál Servisu Investigasaun Kriminál (PNSIK) konsege halo buska  ba atividade ne’e no taka ona.

“Maibé difikulta ba ami mak jogu lotaria sira tanba ninia sistema ne’e manuál liu, la rejistu iha sistema dijitál, entaun susar ba ami atu hetan tanba sistema la akapta,” nia dehan.

jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here