Komponente Naval F-FDTL realiza palestra kona-ba Sistema Autoridade Maritima iha Timor-Leste. Iha Kuartel Jenerál Fatuhada, segunda (10/01). Imajen Tatoli/Francisco Sony

DILI,10 janeiru 2022 (TATOLI)- FALINTIL- Forsa Defeza Timor-Leste (F-FDTL) realiza semináriu hodi introdús lalaok ka funsionamentu implementasaun Sistema Autoridade Marítima ho tema “Operasionalizasaun Sistema Autoridade Marítima (SAM) Timor-Leste nian”.

Objetivu husi semináriu ida ne’e mak atu introdús ba partisipante sira kona-ba lalaok serbisu Autoridade Marítima Nasionál nian liu-liu ho ninia sistema ida ne’ebé integradu, kompostu husi ministériu no instituisaun tantu Governu nomós la’os Governu nian.

Nune’e, bele garante funsionamentu ida ne’ebé di’ak entre entidade hotu-hotu ne’ebé integra-an iha SAM nian laran, tanba besik atu tama ba faze implementasaun.

Xefi Gabinete Forsa 2020, Capitaun de Mar e Guerra, Higino das Neves. Imajen Tatoli/Francisco Sony

“Preparasaun ba implementasaun Sistema Autoridade Marítima iha hela faze finál tanba dokumentu hotu-hotu agora interministeriál halo ona ho regulamentu idak-idak nian atu sumbete ona ba Konsellu Ministru hodi halo aprovasaun atubele hahú implementa ona Sistema Autoridade Marítima,”Xefe Gabinete Forsa 2020 iha instituisaun F-FDTL, Kapitaun de-Mar e Guerra, Higino das Neves, ba jornalista sira  hafoin ramata introdús lala’ok SAM iha salaun-F-FDTL, kaurtél Jenerál-Fatuhada, segunda ne’e.

Semináriu interministérial hodi sensibiliza format servisu no estrutura organiza ba kriasaun Sistema Autoridade Marítima Nasionál tuir dekretu lei númeru 39/2020, 23 setembru.

“Ha’u inisia sensibiliza oituan lei autoridade marítima ba liña ministeriál sira nundar prosesu inísiu  ba harii Sistema Autoridade Marítima (SAM), ne’ebe dezde iha tinan 2006,” Xefe Gabinete forsa 2020 ne’e akresenta.

Tuir nian, sesibilizasaun importante tanba, interministeriál sira presiza entende saida maka atu halo bainhira Timor-Leste iha Autoridade Marítima no organizasaun atu la’o oinsá no funsiona oinsa.

Tanba ekipa liña ministeriál sira ho Komandu F-FDTL diskute ona sei hili sira-nia reprezentante funsionáriu tékniku profisionál na’in rua hodi aprezenta ba AMN hodi halo preparasaun téknika ba ekipa ne’ebé sei hala’o servisu no simu pose iha tempu besik.

Grupu traballu sira ne’ebé tama iha ekipa AMN no Órgaun Sistema Autoridade Marítima mak hanesan, Komponente Forsa Navál Lijeria F-FDTL, Unidade Polísia Marítima UPM-PNTL, Polísia Sientífika Investigasaun Kriminál (PCIC-sigla Portugeza), Servisu Migrasaun, Diresaun Jerál Peska Arkikultura no Rekursu Mariñu, Diresaun Jerál Autoridade Aduaneira/Alfándega, Diresaun Jerál Autoridade Tributária.

Aleinde ne’e, envolve mós Diresaun Jerál Transporte Komunikasaun, Diresaun Jerál Protesaun Saúde, Administrasaun Portu Timor-Leste APORTIL,I.P, Diresaun Jerál Petróliu no Minerál, I.P, Diresaun Jerál Protesaun Sivíl, Ajénsia Investigasaun Fiskalizasaun Autoridade Ekonomia Sanitária no Alimentár AIFAESA, I.P, Diresaun Jerál Ministériu Justisa, Diresaun Jerál Ministériu Finansa, Diresaun Jerál Meiu Ambiente no Diresaun Jerál Turizmu.

Governu suporta implementa SAM

Governu rasik kontinua akompaña ekipa Komandu F-FDTL hodi sosializa formatu servisu no estrutura orgánika ba AMN tuir dekretu lei númeru 39/2020, 23 setembru, ba liña ministeriál hodi fó mós sira-nia hanoin, molok AMN hala’o knaar iha tinan ne’e.

Biban ne’e, Ministru Prezidensiál Konsellu Ministru, Fidelis Manuel Leite Magalhães, hanesan Ministru Defeza Interinu, hateten Sistema Autoridade marítima ne’e komplesidade ho nia natureza serbisu ne’e envolve hosi liña ministeriál sira seluk, la’ós Ministériu Defeza de’it.

Ministru Prezidensial Konsellu Ministru, Fidelis Manuel Leite Magalhães. Imajen Tatoli/Francisco Sony

“Sistema ne’e hakarak afirma soberania nasionál no projeta Estadu nia autoridade iha tasi ne’ebé sujeita ba jurizdisaun Timór nian,” Ministru Fidelis afirma.

Governu ona aprova kriasaun Sistema Autoridade Marítima nu’udar kuadru institusionál atu halo koordenasaun ho entidade sira hanesan órgaun ka servisu sira iha nível sentrál no perifériku ne’ebé ho funsaun halo koordenasaun ho ezekutivu, konsultivu ka polisiál, hodi ezerse podér autoridade Estadu kona-ba espasu marítimu ne’ebé sujeita ba soberania no jurizdisaun nasionál,” dehan Ministru Fidelis hafoin reuniaun ezekutivu iha Palásiu Governu.

Tanba ne’e, Governu kontinua nia papél atu suporta ba implementasaun SAM liuhosi kria lejizlasaun ne’ebé hanaran lei Autoridade Marítima, halo koordenasaun atu garante di’ak liután  funsionamentu sistema ne’e.

“Implementasaun SAM ne’e hakarak ka lakohi tenke gasta osan, tanba kuandu la gasta osan ninian funsionamentu sei la la’o. Atu asesura seguransa iha tasi, ita tenke gasta osan, se ita la gasta risku ne’e lakon boot liu,” Ministru Fidelis hateten.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here