Bee-moos. Imajen/Espesiál

VIQUEQUE, 09 janeiru 2022 (TATOLI)– Koordenadór Bee Timor-Leste (BTL) Munisípiu Viqueque, Marito da Costa, informa  daudaun ne’e komunidade munisípiu Viqueque maioria asesu ona bee-moos ho  gratuita.

“Viqueque iha zona neen, ninia fornesementu ne’e fahe ba zona hothotu maneira fornesementu dia sim e dia não, provizoriamente gratuita, tanba atu halo kobransa ba komunidade tenke la’o ho legalidade ruma, ezemplu monta metru kontadór. Maibé iha ona planu fulan rua mai tan deside ona padraun hodi oinsá kada uma-kain selu bee-moos ona,”Koordenadór ne’e hateten ba Agência Tatoli, wainhira partisipa diálogu Primeiru-Ministru, Taur Matan Ruak ho komunidade Viqueque, iha edifisiu administrasaun Viqueque, sábadu ne’e.

Bee-moos ne’ebé abitante Viqueque vila konsumu, mai hosi bee-matan Loihunu ne’ebé fornese ba komunidade litru 20 pur segundu, maibé bailoro-naruk afeta ba volume bee rasik, hosi litru 20 pur segundu tun to’o litru 3-4 pur sengudu.

Maski nune’e,  komunidade Viqueque liliu iha Viqueque vila maioria (91%) asesu ona sistema bee-moos, alende ne’e ba postu administrativu sira, Bee Timor-Leste, Empreza Públika (BTL,E.P) mós instala ona sistema 54 ne’ebé atinje ona 73%.

Koordenadór ne’e dehan, planu ba oin mak mellora di’ak liután sistema bee-moos atu hatama reseita ba kofre Estadu, alende iha munisípiu ba mós postu administrativu sira.

Tanba ne’e, instala ona sistema grafitasaun bee-moos iha área rurál hamutuk 54 inklui bomba bee.

BTL kontinua esforsu  atu halo melloramentu sistema bee atu komunidade sira ne’ebé konsentra iha munisípiu laran ne’e bele asesu bee-moos hanesan mós munisípiu seluk.

“Iha munisípiu ne’e rasik komunidade kestiona maka’as, maibé  la signifika katak ami abandona sira nia pedidu. Normalmente sira hato’o pedidu ami sempre rezolve tutuir alende munisípiu laran iha mós postu sira tanba iha ajénsia internasionál balun apoia ami hodi rezolve problema bee-moos”, nia dehan.

Iha tinan ne’e,  planu prioridade mellora sistema bee no  hasa’e komunidade ninia konsiensia hodi utiliza sistema ne’ebé instala ona, no hirak ne’ebé seidauk asesu sei alarga tan sistema ne’ebé mak iha hodi sira hetan bee di’ak liu.

Tanba, Munisípiu Viqueque rasik iha orsamentu empréstimu hodi mellora di’ak liután sistema bee-moos nune’e garante bee-moos oras 24 ba komunidade, maibé tékniku sira mós monta kontadór bee-moos no kobra ona komunidade.

Munisípiu Viqueque iha postu administrativu Lima, kompostu hosi postu administrativu Viqueque, Lakluta, Uatulari, Uatucarbau, no Ossu.

Jornalista :Antónia Gusmão

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here