Diretór Ezekutivu ANAAA, Edmundo Viegas. Imajen TATOLI/Nelia Fernandes

DILI, 07 janeiru 2022 (TATOLI)—Avaliasaun ba kursu 25 iha universidade hitu ninia rezultadu submete ona ba Ministériu Ensinu Superiór Siénsia no Kultura (MESSK), maibé seidauk iha desizaun atu publika tanba kestaun tékniku.

“Ami haruka ona rezultadu avaliasaun akreditasaun programátiku ba ministériu, ne’ebé ministériu ho ami seidauk bele haree hamutuk tanba kalendáriu serbisu hosi ministériu seidauk permite ami atu tuur hamutuk, tanba ne’e ami hein de’it, bainhira konvoka reuniaun ami sei tuir hamutuk,” Diretór Ezekutivu Ajénsia Nasionál Avaliasaun Akreditasaun Akadémiku (ANAAA), Edmundo Viegas, Edmundo Viegas, hateten, iha ninia knaar fatin, Balide, sesta ne’e.

Notísia relevante:  ANAAA aprezenta ona rezultadu avaliasaun programa 25 ba MESSK

Tuir Diretór, importante atu publika rezultadu avaliasaun, atu nune’e instituisaun hitu ne’e bele hatene sira-nia progresu.

Rezultadu avaliasaun ne’ebé ANAAA submete ona ba ministériu, ho intensaun atu hetan akreditasaun ikus, maibé tenke haruka uluk ba universidade hitu atu fó komentáriu ruma, nune’e karik iha reklamasaun bele rezolve kedan molok ministériu halo publikasaun iha Jornál Repúblika.

Aleinde ne’e, ANAAA konklui ona avaliasaun institusionál ba universidade ualu ho polo haat iha munisípiu.

“Karik la biban atu fó sai rezultadu ketak-ketak, ami sei tau hamutuk ho rezultadu avaliasaun programátiku inklui institusionál rua, hodi aprezenta dala-ida iha reuniaun Konsellu Diretivu agora, ho nune’e bele fó sai hamutuk ba instituisaun sira,” nia akresenta.

Rezultadu avaliasaun institusionál ba universidade ualu nian konklui ona iha dezembru 2021 no daudaun tama ona iha faze moderasaun iha ANAAA hodi kontinua hein tan rezultadu avaliasaun balun ne’ebé seidauk submete hotu.

Nune’e, ANAAA konsege halo ona avaliasaun 37 iha tinan 2021, kompostu hosi pakote tomak hosi kursu 25 no instituisaun 12.

Jornalista : Tomé Amado  

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here