Diretór Ezekutivu ANAAA, Edmundo da Silva Viegas. Imajen TATOLI/Egas Cristóvão

DILI, 06 janeiru 2022 (TATOLI)—Diretór Ezekutivu Ajénsia Nasionál Avaliasaun Akreditasaun Akadémiku (ANAAA), Edmundo Viegas, relata, tinan ne’e prevee orsamentu ho montante $371.000 atu kontinua halo avaliasaun ba instituisaun ensinu superiór haat foun no realiza programa prioridade sira.

“Avaliasaun instituisaun haat ne’e realiza ona iha tinan kotuk, maibé tanba prazu lisensiatura institusionál ramata ona, mak husu tempu ba ministériu atu tinan-ida tan bele avalia hodi hetan akreditasaun institusionál ba dahuluk iha tinan ne’e. Aleinde ne’e orsamentu ne’ebé prevee ami atu implementa programa prioridade sira,” Diretór ANAAA hateten iha ninia knaar fatin, Balide, kinta ne’e.

Notísia relevante:  ANAAA aprezenta ona rezultadu avaliasaun programa 25 ba MESSK

Institutu haat ne’ebé atu hetan avaliasaun tinan ne’e maka Institutu Politékniku Betanu (IPB), Institutu São João de Brito (ISJdB), Institutu Boaventura Timor-Leste (IBTL) no João Saldanha University (JSU).

Aleinde ne’e, ANAAA sei re-avalia tan kursu balun ne’ebé hetan ona akreditasaun iha tinan-lima liubá, tanba prazu mós ramata ona.

“Iha tinan 2016, ami avalia kursu 11 no tinan 2017 avalia kursu 26, ne’ebé ita iha totál kursu 37 maka ita avalia iha momentu ne’e, maibé tinan ne’e ita atu re-avalia kursu 36 de’it tanba kursu ida hosi tinan 2016 hetan akreditasaun iha tinan 2018, maibé depende ba orsamentu, kuandu la sufisiente ita deside halo uluk re-avaliasaun ba kursu 10 hosi tinan 2016,” nia akresenta.

Enkuantu, kursu 11 ne’ebé ANAAA avalia iha tinan-lima ba kotuk, hosi Universidade Orientál (UNITAL) ba kursu jestaun la hetan akreditasaun iha 2016, maibé re-avalia fali 2018, kursu ne’e akreditada.

Enkuantu, Dili Institute of Technology (DIT) iha kursu Jestaun Finansa akreditadu ona, ICFJ Baucau iha kursu formasaun profesór, Ensinu Báziku akredita ona, IPDC kursu Jestaun Administrativu akredita ona, Institute of Bussiness (IOB) kursu Jestaun Finanseira akredita ona, inklui ICR iha kursu Ensinu Moral Relijiaun Katóliku mós akredita.

ANAAA atribui akreditasaun ba kursu sira ne’e tamba hetan valór di’ak iha tinan lima liubá, ho valór besik 70%.

Tinan ne’e re-avalia fali kursu sira ne’e ninia valór sa’e to’o 360, ne’ebé ekivalente 80% resin, ho kategoria A.

“Ida-ne’e maka ANAAA hakarak haree progresu hosi tinan-lima ikus ne’e ba kursu 10 ne’ebé mak avalia ona iha 2016, tanba ne’e maka sai prioridade ida atu haree fali akreditasaun ba 2022 ne’e,” nia dehan.

Jornalista : Tomé Amado  

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here