Vasina Pfizer.Imajen TATOLI/António Gonçalves

DILI, 05 janeiru 2022 (TATOLI)—Membru Governu sira simu tan vasina Booster Pfizer (doze datoluk) hodi aumenta imunidade kontra moras COVID-19, haree ba daudaun ne’e variante Omicron mosu ona iha país balun.

“Hafoin reuniaun Konsellu Ministru, membru Governu sira hotu simu vasina Booster Pfizer, hanesan vasina adisionál hodi haforsa liután vasina ne’ebé antes ne’e simu ona,” Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun Ezekutivu, iha Palásiu Governu, kuarta ne’e.

Enkuantu Primeiru-Ministru (PM), Taur Matan Ruak, seidauk disponível simu vasina tanba hahú aban (kinta) sei halo viajen ba munisípiu no bainhira fila hosi viajen maka sei simu.

Notísia relevante: Governu hahú implementa vasina doze datoluk ba liña frente

Tuir Ministru, vasina ne’e hanesan rekomendasaun hosi saúde hodi hasoru ameasa hosi mutasaun vírus.

“Tanba ne’e importante tebes atu sidadaun hotu ba buka vasina iha sentru vasinasaun sira, atubele haforsa liután vasina ne’ebé simu ona hodi aguenta ameasa saida de’it ne’ebé sei mai hosi vírus ne’e,” nia akresenta.

Vasina doze dahuluk lansa iha loron 07 abríl 2021, ne’ebé partisipa hosi orgaun sobaranu, membru ezekutivu, eis titulár, korpu diplomátiku no populasaun sira.

To’o loron 11 novembru, ema hamutuk 576.834 (76,4%) iha territóriu tomak mak simu ona vasina doze dahuluk, enkuantu ema hamutuk 384.744 (51%) mak simu ona doze daruak.

Populasaun ne’ebé simu ona vasina doze dahuluk iha munisípiu Dili hamutuk 178.386 (83,4%) no doze daruak hamutuk 158.621 ho 74,2%.

Governu hahú implementa vasina doze datoluk iha loron 04 janeiru 2022, ne’ebé daudaun iha stock doze 4.500, sei fó prioridade ba liña frente, idozu, ema ho moras króniku no iha risku vírus atu daet lalais.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here