Pesoal Mediku sira bainhira halo hela atendementu ba pasinete moras dengue iha salaun emergensia HNGV, kuarta 5/1/2022.Imajen Tatoli/Antonio Dasiparu

DILI, 05 janeiru 2022 (TATOLI)—Diretór Ezekuitvu Hospitál Nasionál Guido Valadares (HNGV), Alito Soares, informa, daudaun ne’e laiha ona espasu liuliu kama atu akumula pasiente foun sira hodi baixa.

Diretor HNGV, Dr Alito Soares, Imajen Tatoli/ Antonio Dasiparu

“HNGV durante ne’e úniku ospitál tersiáriu iha Timor-Leste ne’ebé hala’o atendimentu primaria no sekundária, maibé espasu ka kama la sufisiente ona atu simu pasiente foun. Maski ita aumenta ona extra bed 71 ba kama 350 ne’ebé sa’e ona ba 421, maibé la sufisiente nafatin,” Diretór Ezekutivu HNGV, hateten ba jornalista sira iha knaar fatin HNGV-Bidau, kuarta ne’e.

Hosi totál kama 350 ne’e, kompostu  iha  sala emerjénsia hamutuk 21,  medisina  homem  28, medisina mulher 28,  sirurjia homem 28,  sirurjia mulher 27, NIFAS 30, maternidade 35, perinatolojia 43, pediátria A 32, pediatria B 12,  VIP 19, ICU neen, extra bed  A 14, extra bed B  14 no pulmonolojia 13.

Hahú hosi novembru 2021 to’o janeiru 2022, baku emerjénsia fó atendimentu ba pasiente kada loron 250, hosi númeru ne’e pasiente 40 to’o 50 mak baixa.

“Ita haree, horisehik (04/01), ne’e pasiente 63 mak baixa no daudaun ne’e pasiente ne’ebé baixa iha HNGV hamutuk 750, maioria moras dengue. Ita imajina kama atuál iha 350 la sufisiente duni ne’ebé pasiente na’in rua mak uza kama ida,” nia akresenta.

HNGV hahú koordena ho Diresaun Enfermajen Kualidade Kontrolu no Klínika no Xefe Departamentu sira atu apoia kada unidade sira hodi repsonde situasaun ne’e.

Pesoal Mediku sira bainhira halo hela atendementu ba pasinete moras dengue iha salaun emergensia HNGV, kuarta 5/1/2022.Imajen Tatoli/Antonio Dasiparu

Alende ne’e, HNGV mós halo ona koordenasaun ho Servisu Saúde Munisípiu Dili atubele observa pasiente sira ho moras dengue, maibé la komplikadu no kazu diareia sira.

“Dahuluk mak ita uza másimu extra bed hodi halo nakonu fatin koridór sira atu pasiente sira bele baixa hodi hetan tratamentu intesivu hosi médiku sira,” nia akresenta

Tuir nia, kazu ne’e akontese tanba pasiente balun hosi Dili tuir loloos halo tratamentu saúde iha sentru saúde sira, bainhira moras grave mak transfere mai iha HNGV.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here