Diretór Servisu Saúde Munisipiu Bobonaro, João Barreto Cardoso. Imajen Tatoli/Sérgio da Cruz.

BOBONARO, 03 janeiru 2022 (TATOLI) – Servisu Saúde Munisípiu Bobonaro liuhosi ekipa vijilánsia sentinela Hospital Referál Maliana (HRM), domingu ne’e deteta kazu komfirmadu pozitivu Covid-19 foun rua, iha postu administrativu Maliana Vila.

Diretór Servisu Saúde Munisípiu Bobonaro, João Barreto Cardoso, informa, sidadaun na’in-rua ne’e mane hotu, ida hosi suku Lahomea ho inisiál (YH) idade 11, no ida seluk mai hosi aldeia Pipgalak I, suku Tapo-Memo, ho inisial (EM) idade 16.

“Hakarak informa de’it katak, iha pasiente na’in-rua ne’ebé mai halo konsulta iha Hospital Referál Maliana, ida  tanba samea tata no ida seluk tanba moras dengue, hanesan prosedimentu iha ospital kuandu ema mai halo tratamentu ita halo swap, ita konsege deteta joven na’in-rua hetan pozitivu Covid-19,” nia ko’alia iha Maliana, segunda ne’e.

Nia dehan, daudaun ne’e ekipa vijilánsia Covid-19 munisípiu Bobonaro halo ona Contac Tracsing ba sidadaun pozitivu insiál (YH) iha suku Lahomea ba nia familia ne’ebé halo kontaktu besik.

Enkuantu kona-ba sidadaun (EM) aban ekipa sei halo teste ba família sira iha suku Tapo-Memo, tanba ne’e husu família atu koopera ho ekipa vijilánsia sira.

“Sira na’in-rua ne’e agora ita izola hela fatin retensaun temporária iha Hospital Referénsia Maliana, depois ita haree tanba iha-ne’ebá mós iha ICU nomoos izolamentu entaun ita koloka sira ba iha-ne’ebá hodi akompaña sira-nia kondisaun saúde,” nia esklarese.

Ho kazu foun rua ne’e, Responsável Saúde Munisípiu Bobonaro, apela ba komunidade hotu iha liña fronteira hanesan iha postu administrativu Lolotoe, Maliana Vila no Balibo atu nafatin kumpre regra protokulu saúde, uza maskára beibeik, prátika ditánsia fiziku no sosiál, evita halibur malu iha fatin-fatin hodi prevene-aan hosi propagasaun surtu Covid-19.

Entretantu fasilidade Covid-19 ne’ebé governu konstrui atu responde ba kazu Covid-19 iha munisípiu Bobonaro mak hanesan kuarentena no izolamentu iha suku Batugade, postu administrativu Balibo.

Nune’e mós izolementu, sala ICU ida no laboratóriu mákina PCR iha Hospital Referál Maliana no izolamentu ida iha aldeia Bilicou, suku Holsa, postu administrativu Maliana Vila mós preparadu hela.

Iha parte seluk, Diretór servisu saúde Munisípiu Bobonaro ne’e informa fulan ne’e ekipa sei halo sensibilizasaun vasina Pfyzer iha eskola hotu ne’ebé establese iha postu administrativu neen, munisípiu ne’e hodi partilla informasaun kredivel kona-ba efeitu hosi vasina ne’e rasik.

“Agora ami halo ona koordenasaun ho parte edukasaun, sé la sala loron 16 ka 17 hanesan ne’e mak estudante sira tama, entaun sira tama eskola mak ita tama iha implementasaun,” nia informa.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here