Telekomunikasaun uza fibra óptika. Imajen/Espesiál

DILI, 04 janeiru 2022 (TATOLI)–Projetu ligasaun kabu submarinu ne’ebé liga hosi Austrália mai Timor-Leste, ninia progresu dadaun ne’e iha ona Komisaun Nasionál Aprovizionamentu (CNA, sigla portugés).

“Daudaun ne’e, monitoriza diretamente hosi Vise Primeiru-Ministru, José Maria dos Reis, ha’u rasik no Ministru Finansa, Rui Augostu Gomes, ami haree lisuk asuntu ne’e,” Ministru Transporte no Komunikasaun, José Agustinho da Silva, informa, hafoin reuniaun ho Xefe Ezekutivu, iha Rezidénsia Farol, tersa ne’e.

Tuir governante ne’e, bazeia ba esperiénsia iha tinan kotuk (2021), durante fulan-lima Governu konsege la prodús serbisu ruma, maibé konsege rekupera filafali serbisu sira iha fulan ikus.

“Ami-nia esforsu sei finaliza projetu ne’e molok mandatu VIII Governu ramata no sei halo esforsu di’ak liután atubele ramata sedu hodi fasilita ita-nia festa demokrasia,” nia akresenta.

Iha tinan 2020, Governu liuhosi reuniaun Konsellu Ministru  delibera no aprova projetu ligasaun kabu submarinu ne’ebé liga hosi dade Darwin no Port Hedland iha Commonwealth Austrália mai Timor-Leste.

Notísia relevante: Governu aprova ligasaun fibra óptika hosi Austrália mai Timor-Leste

Polítika dada kabu submarinu hosi Darwin mai Timor-Leste nu’udar prioridade Governu Timor-Leste, ho kooperasaun Governu Canberra, ne’ebé mai ho objetivu atu eleva kapasidade rede internet iha rai laran tanba VIII Governu Konstitusionál iha programa Governu eletróniku, ne’ebé presiza liña internet lais.

Governu prevee millaun $41,588 ba verba Fundu Infraestrutura (FI) iha proposta Lei Orsamentu Jerál (OJE) tinan fiskál 2021 hodi halo akizisaun ekipamentu informátika kabu submarinu (fibra óptika).

Nune’e, iha empreza internasionál na’in-20 hahú konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu fibra ótika.

Daudaun ne’e, banda internet internasionál ho kapasidade 6 Gigabyte/segundu, ne’ebé fahe ba populasaun iha territóriu tomak atu asesu ba internet liuhosi operadór Timor Telecom, Telkomcel no Telemor.

Enkuantu, Governu liuhosi Ministériu Transporte no Komunikasaun (MTK)  aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Governu iha ona planu atu atualiza hosi kapasidade 200 megabyte/segundu ba 1 gigabyte/segundu, atubele ajuda bainhira seidauk iha rede fibra óptika.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here