Ministru Edukasaun Joventude no Desportu (MEJD), Armindo Maia. Imajen Tatoli/Francisco Sony

BAUCAU, 29 dezembru 2021 (TATOLI) – Ministru Edukasaun, Juventude no Desportu (MEJD), Armindo Maia, sei esforsu rezolve preokupasaun profesór kontratadu iha 2022.

Ministru Armindo Maia, hateten, tinan 2022 sei lori proposta ba Konsellu Ministru (KM) kona-ba futuru profesór kontratadu ne’ebé to’o oras ne’e seidauk sai funsionáriu públiku.

Governante ne’e lakohi promete maibé sei esforsu hato’o mós proposta ba autoridade kompetente, ministeriu relevante inklui Komisaaun Funsaun Públika.

“Karik bele aprova netik rezolusaun ruma hodi hatán netik preukupasaun profesór kontratadu sira-nia ezijénsia,” Armindo Maia, hateten iha Sentru Konvensaun Baucau (CCB, sigla Portugés), kuarta ne’e.

Maske nune’e, nia dehan, esforsu sei labele rezolve dala-ida de’it tanba numeru profesór kontratadu iha territóriu nasionál hamutuk na’in-5.203, nune’e sei solusiona ho fazeadamente.

“Hakarak informa profesór kontratadu na’in-248 ne’ebé durante tuir formasaun baixarelatu iha INFORDEPE polo 1 Baucau naran tama hotu ona iha profesór 5.203 nível terirtóriu Timor,” Armindo argumenta.

Profesór kontratadu Manuel Casemiro Gusmao, hateten, nu’udar manorin-na’in kumpri ona dever, liuliu kumpri regra ministériu nian atu sai profesór mínimu tenke iha edukasaun nível baixarelatu ne’ebé durante tinan-tolu tuir formasaun tanba ne’e iha direitu atu sai funsionáriu públiku.

“Ami kumpri ona no halo ona judisium maibé oinsá ami-nia futuru, bainhira mak sai funsionáriu públiku ka nafatin kontratadu,” Manuel preokupa.

Entretantu, total profesór iha munisípiu Baucau hamutuk 2.200-resin, hosi númeru ne’e profesór kontratadu hamutuk 248.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here