TDD liuhosi desizaun primeiru interrogatóriu aplika medida koasaun prizaun preventiva ba arguidu JCP ne'ebé oho nia feen no taa kanek nia oan nain- rua iha aldeia Vatubou-Liquiça. Imajen/ Natalino Costa.

DILI, 28 dezembru 2021 (TATOLI)- Tribunál Distritál Dili (TDD), liuhosi desizaun primeiru interrogatóriu, tersa ne’e (28/12), aplika medida koasaun prizaun preventiva ba arguidu ho inisiál JCP, ne’ebé oho nia feen no taa kanek nia oan nain-rua iha aldeia  Vatubou, Munisípiu Liquiça.

Kazu krime omisídiu agravadu ne’e akontese iha, tuku 09:00 dadeer, iha loron sábadu (25/12), arguidu halo asaun hodi taa mate nia-feen no hakanek mós nia oan na’in-rua ho kondisaun grave, ne’ebé daudaun iha Hospitál Nasional Guido Valadares hodi hetan atendimentu intensivu.

Iha prosesu julgamentu Primeiru Interrogatóriu ne’e taka ba públiku,  maibé tribunál aplika prizaun preventiva  ba arguidu tanba iha indísiu forte, Arguidu komete krime omisídiu agravadu  no tentative omesidu ne’ebé previstu iha artigu 139 Kodígu Penál Timor-Leste, no krime Arma Branka, lei númeru 05/2017.

Hafoin julgamentu Defesór Públiku, João Carvalho, hateten, aseita ho medida koasaun prizaun preventiva ne’ebé alega hosi Ministériu Públiku no sei kontinua fó asisténsia legàl ba nian kliente iha prizaun.

Ho desizaun Tibunál Distritál Dili, parte Polísia ezekuta hodi transporta kedan arguidu ba prizaun Bekora hodi hein prosesu investigaaun tuir mai.

Julgamentu ne’e, prezide hosi juís singular, María Solana, Ministériu Públiku reprezenta hosi Ricardo Leite no Arguidu hetan asisténsia legàl hosi Defesór Públiku, João Carvalho.

Notísia Relevante: Suspeitu kazu omisídiu iha Liquiçá detein ona iha sela

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here