Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 28 dezembru 2021 (TATOLI)–Ministru Administrasaun Estatál (MAE), Miguel Pereira de Carvalho, informa, Sekretariadu Tékniku Administrasaun Eleitorál (STAE) preparadu ona atu realiza Eleisaun Prezidensiál.

“Ha’u informa ba Primeiru-Ministru ligadu ho Eleisaun Prezidensiál tinan-2022, ne’ebé STAE nu’udar orgaun Governu ne’ebé atu ezekuta aktu eleitorál, preparadu ona atu realiza eleisaun no STAE mós informa ona ba Prezidente Repúblika no ha’u rasik, kona-ba kalendáriu tentativa ba eleisaun no janeiru sei dekreta loron ba eleisaun,” Ministru hateten hafoin hasoru Primeiru-Ministru, Taur Matan Ruak, iha rezidénsia ofisiál, Farol, segunda ne’e.

Notísia relevante: Prezidente Repúblika sei dekreta kalendáriu eleisaun prezidensiál iha janeiru 2022

Preparativu sira ne’ebé STAE halo, to’o ohin loron atinje ona 90%, falta de’it buat balun mak presiza halo atu kompra materiál la’ós sensitivu.

“Sasán la’ós sensitivu sira balun sosa ona, maibé tanba pandemia COVID-19 mak seidauk to’o mai Timór, maibé molok to’o loron eleisaun, sasán sira sei to’o hotu ona,” nia akresenta.

Antes ne’e, MAE aprezenta ona kalendáriu tentativa realiza Eleisaun Prezidensiál, iha loron 18 marsu 2022 ba Prezidente Repúblika, Francisco Guterres ‘Lú Olo’.

Biban ne’e, Primeiru-Ministru no MAE mós ko’alia kona-ba preparativu ba eventu loron 20 maiu, tanba iha loron ne’e, aleinde komemora loron restaurasaun independénsia, realiza mós seremónia toma pose ba Prezidente Repúblika ba períodu 2022-2027.

Jornalista : Antónia Gusmão

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here