Seremónia graduasaun UNPAZ iha salaun José Casimiro, Manleuana, segunda (27/12). Imajen/UNPAZ

DILI, 27 dezembru 2021 (TATOLI)—Universidade da Paz (UNPAZ), segunda ne’e, realiza seremónia gradusaun ba programa Lisensiatura ba dala-XV hosi Fakuldade Saúde Públika, Direitu no Siénsia Sosiál Umana inklui programa Mestradu ba dala-V, ho totál finalista na’in-600.

Eventu ne’e realiza ho tema ‘Lisensiadu/a UNPAZ prontu atu halo inovasaun ho kreatividade iha tempu pandemia’ ba tinan akadémiku 2021.

Iha biban ne’e, Reitór UNPAZ, Adolmando Soares Amaral, motiva graduadu sira atu sai ema kreativu no inovativu, nu’udar badaen di’ak iha sosiedade nia leet.

Reitór UNPAZ, Adolmando Soares Amaral gradua finalista, iha salaun José Casimiro, Manleuana, segunda (27/12). Imajen/UNPAZ

“Ita-boot ne’ebé ohin simu graduasaun, presiza hatudu kapasidade iha sosiedade nia le’et. Ha’u ezije liu tenke hahalok kreatividade no inovativu la’o hamutuk. Imi bele inovasaun maibé laiha kreatividade, sei labele halo buat ida. Durante tinan naruk, universidade prepara ita-boot sira sai matenek no hakarak sai ema ne’ebé iha badaen di’ak, nune’e bainhira filafali ba moris iha sosiedade nia le’et, ema bele simu imi-nia prezensa,” Reitór Adolmando hateten iha seremónia graduasaun, iha salaun José Casimiro, Manleuana.

Notísia relevante: Universidade tolu submete lista graduasaun 2.101 ba MESSK

Reitór dehan, maski estudante sira liu ona prosesu lubuk ida ho dezafiu oin-oin, maibé konsege rezolve hotu, tanba ne’e universidade husu nafatin graduadu sira atu implementa didi’ak matenek.

“Tenke haraik-an no bele moris iha sosiedade nia leet, hodi bele serbisu hamutuk ho komunidade, labele sai matenek no badaen di’ak maibé sosiedade la simu atu serbisu hamutuk. Bainhira akontese, matenek ne’ebé universidade fahe no esforsu hosi inan-aman saugati de’it, tanba ne’e modalidade ne’ebé atu lori ema ida sai susesu iha futuru maka hahalok kreatividade no inovativu,” nia enkoraja.

Maski nune’e, Reitór UNPAZ otimista graduadu sira bele organiza-an atu sai servidór di’ak ba povu, nune’e ema hotu bele sente dezenvolvimentu hosi kontribuisaun matenek-na’in sira.

Prodúz matenek-na’in foun tanba komunga polítika jerasaun tuan

Tuir Reitór UNPAZ, universidade kada tinan prodúz ninia matenek-na’in foun tanba komunga polítika jerasaun tuan, ne’ebé hakarak hasai povu hosi risku laran ba moris di’ak.

“Durante ne’e, líder antigu sira labele serbisu mesak, tanba ne’e instituisaun ensinu superiór sira inklui UNPAZ kontinua prodúz matenek-na’in foun sira atu asegura sira-nia polítika ho intensaun no hanoin di’ak, fuan boot ba povu no rai ida-ne’e,” Adolmando Soares Amaral halo palestra sientífiku durante seremónia graduasaun.

Nune’e, nia husu jerasaun foun sira ne’ebé hetan oportunidade, bele asegura polítika jerasaun tuan no tenke tau-an ho loloos.

“Labele iha oin dehan atu ba asegura, hafoin komunga tiha polítika jerasaun tuan sira-nia, lakleur sai tan militante no simpatizante hodi buka estraga no hamonu malu fali. Ha’u husu jerasaun foun UNPAZ atu kuidadu almamater, labele sai jerasaun foun ne’ebé nakonu ho arogánsia no hakarak sai polítiku hodi asegura polítika jerasaun tuan, maibé tenke sai jerasaun foun ne’ebé iha vizaun luan, tanba nasaun ne’e iha ita hotu nia liman no responsabilidade. Imi ninia partisipasaun ba futuru mak bele dezenvolvimentu nasaun,” nia subliña.

Reitór mós enkoraja graduadu sira sai jerasaun foun ne’ebé nakonu ho maturidade polítika no labele monu ba manobra no lasu sira atu buka estraga malu, maibé tenke ativu hodi fó hanoin ba jerasaun antigu sira.

“Ita sira-ne’ebé mak aprende siénsia hosi ensinu báziku to’o ensinu superiór ne’e, iha responsabilidade morál atu apoiu jerasaun tuan sira hodi dada sai povu ne’e hosi risku, atu ba hetan moris di’ak, liuhosi dezenvolvimentu rai ne’e, nune’e loron ida ita hotu bele sente efeitu ukun-an,” nia tenik.

Biban ne’e, Reprezentante família graduadu, Gustavo da Cruz, apresia no orgullu tanba depozita ona konfiansa ba universidade hodi bele eduka oan sira liuhosi edukasaun formál, ne’ebé ikus mai bele atinje sira-nia mehi hetan graduasaun.

“Ami tau fiar ba universidade ne’e hodi lori ami-nia oan sira ba futuru no dezenvolvimentu nasaun Timor-Leste. Hanesan inan-aman, ami sente katak susar no terus, ami-nia orasaun ne’ebé hasa’e durante tinan haat to’o lima la saugati, tanba iha momentu ohin ami-nia oan sira bele atinje mehi, ami fiar UNPAZ sei hamriik metin nafatin hodi aposta kualidade ensinu ne’ebé di’ak ba nasaun,” Gustavo da Cruz dehan.

Nune’e mós, Reprezentante Graduadu, Julia Fátima Rebelo, agradese no haksolok tanba bele ultrapasa prosesu lubuk ida hodi ohin bele partisipa graduasaun.

“Ami-nia prosesu luta durante tinan barak nia laran, ohin ami bele to’o iha faze ida-ne’e, ami haksolok no orgullu tebes, tanba loron ida-ne’e sai momentu istóriku ba ami ida-idak nia vida akadémiku,” nia dehan.

Biban ne’e, nia parte agradese parte hotu ne’ebé envolve iha prosesu, espesiál liu ba inan-aman ninia domin no sakrifísiu.

“Ohin ami bele sai Lisensiadu no Mestradu, bele sai ema ne’ebé útil ba povu no nasaun, agradese mós ba ami-nia manorin-na’in sira iha UNPAZ, ne’ebé orienta no forma ami durante tinan barak, ho sira-nia matenek liuhosi siénsia no abilidade ne’ebé iha. Fiar katak hamutuk ho antigu alunu sira, ami sei organiza-an ho di’ak, atu labele sai de’it adeptu, maibé bele sai mós jogadór iha istória jerasaun foun, hanesan jerasaun kontinuadór ne’ebé presiza kaer liman hamutuk hodi jere no prezerva rekursu ne’ebé iha,” nia dehan.

Totál estudante finalista UNPAZ ba tinan akadémiku 2021 hamutuk 1.087, ne’ebé universidade realiza seremónia graduasaun ba loron-rua.

Loron dahuluk seremónia graduasaun ba estudante finalista 600, kompostu hosi Fakuldade Siénsia Polítika na’in-208, Fakuldade Siénsia Sosiál Umana na’in-178, Fakuldade Direitu na’in-184 no programa Mestradu 30, enkuantu estudante finalista na’in-492 sei realiza tuir seremónia graduasaun iha loron 29 dezembru 2021.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here