BOBONARO, 24 dezembru 2021 (TATOLI) – Xefe suku Leo-Lima, postu administrativu Balibo, munisípiu Bobonaro, Marcelino Magno, husu governu orienta Institutu Jestaun Ekipamentu, Empreza Públiku (IGE.EP), normaliza estrada ho kilómetru 10, aldeia Fatuk-Boot ligasaun hosi Balibo-ba postu administrativu Maliana Vila tanba erozaun.
Estrada refere rai husi foho-leten halai (erosaun) taka-metin hafoin akontese udan-boot iha kinta (23/12) por volta tuku 6:00 lokraik, difikulta movimentasaun trasnporte públiku no privada paradu totál.
“Ami hanesan líder komuntária, husu Ministériu Obra Públika atu lori ekipamentu sira mai aselera servisu nune’e labele hotu, tanba agora ema, kareta sira labele liu ba mai,” nia informa ba Agência TATOLI liuosi viatelefónika, kinta ne’e.
Nia dehan, bainhira governu la halo intervensaun lalais, sei afeta mós kompañia sira atu distribuisaun nesesidade bázika no sasán sira seluk ba iha kapiáal Maliana, Cailaco, Bobonaro no Lolotoe, tanba iha tempu udan laiha tán dalan alternativu seluk ultrapasa.
Nune’e mós difikulta transporte públiku tula pasajeiru sira hosi Dili mai Maliana atu partisipa selebrasaun Natál.
“Ita bele liuhosi Manduki nian, mosu fali iha área mota Nunura, maibé ha’u hanoin tempu udan hanesan ne’e labele tanba mota-boot, ne’ebé só dalan ida-ne’e de’it mais agora ita sei labele liu, rai nafatin halai hela ne’e,” nia akresenta.
Jornalista : Sérgio da Cruz
Editór : Evaristo Soares Martins
