Vítima dezastre naturál simu apoia emerjénsia hosi Protesaun Sivíl no Dezastre Naturál Munisípiu Baucau no CVTL iha Bucoli. Imajen Tatoli/Natalino Belo.

BAUCAU, 23 dezembru 2021 (TATOLI) – Governu liuhosi Servisu Munisipál Portesaun Sivíl no Dezastre Naturál Baucau apoia ona nesesidade bázika ba vítima dezastre naturál suku Bucoli, postu administrative Baucau Vila.

Diretór Servisu Munisipál Protesaun Sivíl no Dezastre Naturál Baucau, Nelson Nunes hateten akontesimentu refere parte protesaun sivíl rekolla ona dadus komposta hosi uma bainbain, uma lisan no dapur ne’ebé hetan estragus iha loron tersa,  21 dezembru.

Vítima dezastre naturál simu apoia emerjénsia hosi Protesaun Sivíl no Dezastre Naturál Munisípiu Baucau no CVTL iha Bucoli. Imajen Tatoli/Natalino Belo.

“Ita rai hamutuk sasan ajudu ho Cruz Vermella Timor-Leste (CVTL) Baucau sei apoia fós inklui nesesidade dapur hanesan bikan, kanuru, basian no seluk tan,” Nelson hateten iha Vila Nova, kinta ne’e.

Parte Protesaun Sivíl mós relata ona nesesidade bázika ne’ebé la sufisiente ba nasionál hanesan super mie, sardina, mina no fós atu distrubui ba vítima dezastre naturál.

Nelson subliña, dadus xefe-família 81 ne’e aumenta tán xefe-família 16 nune’e total xefe-família hamutuk 97 no uma hela-fatin ne’ebé estragus hamutuk 57, uma lisan lima, dapur sia, eskola ida no dapur sede suku ida.

“Horisehik mosu fallansu depois ami atualiza fali iha totál hamutuk xefe-família 97,” Nelson akresenta.

Nia fó-sai katak, atu rekupera ba vítima sira-nia uma sei reverifika tán uma-ne’ebé estragus hodi kategoriza ba aat-totál, kmaan no aat-natoon antes apoia materiál konstrusaun ba vítima dezastre naturál.

“Dadus ami rekolla ona, ami sei konsulta ho autoridade suku atu hatene klasifikasaun estragus,” nia katak.

Tuir observasaun Agência TATOLI iha terrenu nota katak, daudaun ne’e vítima balun hela provizóriu ho vizinu nia uma, enkuantu vítima balun hahú hadia hikas uma.

Notisia relevante: Udan oras-rua iha Baucau, estraga uma-kain 81 no EBF Bucoli aat totál

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here