Pesoál saúde halo atendimentu ba komunidade ne’ebé atu halo swab teste iha Sentru Konvensaun Dili, segunda (27/09/21). Imajen TATOLI/António Gonçalves

DILI, 22 dezembru 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19 realiza tan pagamentu suplementu remuneratóriu ba pesoál liña frente ho montante millaun $10,9 ba benefisiáriu 3.308.

“Pagamentu ba pesoál saúde Ospitál Referál Suai, Maliana, Maubessi, Rejiaun Administrativa Espesiál Oé-cusse-Ambeno (RAEOA), Servisu Saúde munisipál Viqueque, Covalima, Baucau no Lautem, SAMES, Servisu Nasionál Ambulánsia no Emerjénsia Médika inklui Pilar 1 to’o 9, períodu fulan janeiru to’o setembru 2021,” refere nota ne’ebé Agência TATOLI asesu, kuarta ne’e.

Antes ne’e, iha loron 30 novembru, Sekretariadu Tékniku halo ona pagamentu ba pesoál liña frente MS ne’ebé presta serbisu iha ámbitu prevensaun no mitigasaun COVID-19 ho totál pagamentu millaun $7,4 ba benefisiáriu 2.414 ne’ebé kobre ba períodu janeiru to’o setembru 2021.

Notísia relevante: MF halo pagamentu suplementu remuneratóriu ba pesoál liña frente MS

Benefisiáriu sira kompostu hosi Servisu Saúde munisípiu Dili hamutuk 854 ho totál pagamentu millaun $2,4, pesoál saúde Hospital Nasional Guido Valadares (HNGV) hamutuk 1.265 ho pagamentu millaun $4,1, enkuantu Ospitál Referál Baucau iha pesoál saúde hamutuk 295 ho totál pagamentu $900.372.

Antes ne’e, Prezidente Repúblika, Francisco Guterres ‘Lú Olo’, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 no bainhira Orsamentu Jerál Estadu (OJE) 2021 ramata, presiza hatutan suplementu ne’e ba tinan 2022, ne’ebé presiza iha fali Dekretu-Lei foun ida.

Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no FALINTIL-Forsa Defeza Timor-Leste (F-FDTL) ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiku, no servisu autoridade ka administrasaun munisipál,  responsável ba halibur, lori no  soe lixu, sira-ne’ebé hola parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha RAEOA.

Xefe Estadu promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha setembru 2020, Dekretu-Lei ne’e hetan alterasaun dahuluk.

Nune’e, ho alterasaun daruak ba Dekretu-Lei ne’e, aumenta tan profisionál sira ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, guarda prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Ho alterasaun ne’e, traballadór sira-ne’ebé serbisu iha administrasaun direta ka indireta Estadu no hala’o knaar iha risku laran relasiona ho COVID-19 hosi marsu 2020, bainhira hatudu prova dokumentál, iha direitu atu hetan pagamentu suplementu remuneratóriu ba kada loron serbisu efetivu ne’ebé halo ona.

Ida-ne’e ho objetivu atu proteje direitu adquiridu hosi traballadór sira iha liña frente hosi kedas marsu 2020, ne’ebé Prezidente Repúblika veta diploma kona-ba Suplementu Remuneratóriu no Governu hato’o iha jullu 2021.

Jornalista : Antónia Gusmão

Editora     : Julia Chatarina

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here