CNE-STAE RAEOA esklarese aktu eleitorál ba estudante ESG-Palaban. Imajen Tatoli/Abílio Elo Nini.

OÉ-CUSSE, 22 dezembru 2021 (TATOLI) – Komisaun Nasionál Eleisaun (CNE, sigla portugés) no Sekretariadu Téknika Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), kuarta ne’e esklarese aktu eleitorál ba estudante sira iha Eskola Sekundáriu Jerál (ESG, sigla protugés) Palaban.

“Atividade ne’e meiu ida atu mai esklarese no informa ba estudante sira kona-ba oinsá asesu kartaun eleitorál ba sira-ne’ebé idade foin tinan 16, aktu eleisaun no oinsá partisipa iha prosesu resensiamentu eleitorál no atualiza kartaun eleitorál, hodi partisipa iha eleisaun tuir mai,” Diretór CNE nasionál, Adão Soares, ko’alia iha ámbitu sensibilizasaun ne’e.

Nia fó sai katak, estudante sira mós iha direitu votu iha loron eleisaun, hodi kumpri nu’udar sidadaun.

Diretór ESG Palaban, Cristino Nunes, agradese ba orgaun administrasaun eleitorál rua ne’e, tanba fahe informasaun ba estudante sira, nu’udar jerasaun foun ho partisipa iha eleisaun períodu tuir mai.

“CNE no STAE mai enkoraja no fahe informasaun ba alin sira, tanba estudante sira-ne’e maioria seidauk asesu kartaun eleitorál, entaun ho prezensa orgaun rua ne’e bele motiva sira oinsá bele asesu hodi ezersie sira-nia direitu votu iha loron eleisaun,” nia katak.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here