VARANDA DILI PAM Dili haruka karta ba MAE normaliza iluminasaun iha estrada públiku

PAM Dili haruka karta ba MAE normaliza iluminasaun iha estrada públiku

874

DILI, 21 dezembru 2021 (TATOLI)—Prezidente Autoridade Munisípiu (PAM) Dili, Guilhermina Filomena Saldanha Ribeiro “Margi” informa, nia parte haruka ona karta ba Ministériu Administrasaun Estatál (MAE), atu koordena ho Ministériu Obras Públika (MOP), hodi normaliza iluminasaun (lampu) iha estrada públiku.

“Iha semana kotuk, sesta (17/12) ha’u halo ona karta hato’o ba Ministru Administrasaun Estatál (MAE), Miguel Pereira de Carvalho, atu haruka ba Ministru Obras Públika nune’e bele hatun ba Empreza Públika EDTL atu bele konsidera, hodi normaliza iluminasaun iha estrada públiku no jardin sira iha Dili laran ne’ebé daudaun ne’e la funsiona,” Guilhermina Filomena Saldanha Ribeiro hateten ba Agência Tatoli, iha Hotel Timor, foin lalis ne’e.

Iluminasaun iha Jardin LARGO LECIDERE. Imajen Tatoli/Francisco Sony.

Tuir nia, Autoridade Munisípiu Dili hanoin atu normaliza iluminasaun iha estrada públiku ne’ebé la funsiona ka la lakan ona, maibé kompeténsia ne’e la’ós Autoridade Munisípiu Dili nian, tanba seidauk entrega autoridade tomak ba Autoridade Munisípiu Dili.

“Situasaun ita haree katak EDTL sai tiha empreza públiku ona, entaun susar uitoan. Agora presiza oinsá ami koordena no halo karta atu sira tau hela atensaun ba situasaun ida-ne’e. Só ho maneira ida-ne’e mak ami bele halo,” nia dehan.

Iluminasaun iha jardin 5 de Maiu Kolmera la funsiona ho di’ak. Imajen Tatoli/Francisco Sony.

Ministru Administrasaun Estatál (MAE), Miguel Pereira de Carvalho, informa nia parte simu ona karta hosi Prezidente Autoridade Munisípiu Dili ba normalizasaun ahi-oan iha estrada públiku no jardin sira iha kapitál Dili ne’ebé agora la funsiona.

“Karta ha’u simu ona no iha loron segunda horisehik ha’u mós haruka ona ba iha Ministru Obras Públika atu normaliza iluminasaun iha dalan públiku no iha jardin sira iha Dili laran ne’e,” Governante ne’e dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here