Ministru Agrikultura no Peska, Pedro dos Reis. Imajen TATOLI/Egas Cristóvão

DILI, 20 dezembru 2021 (TATOLI)— Ministru Agrikultura no Peska (MAP), Pedro dos Reis, konsidera, nia parte deside halo lansamentu importasaun ofisiál manu-futu ka manu-madena hosi Indonézia atubele  limite importasaun manu-futu ilegál.

“Ita haree manu-futu ka manu-madena ne’e iha Timór la haki’ak, só nasaun seluk-mak haki’ak hanesan iha Bali-Indonézia no nasaun seluk, maibé iha Timór ita haree iha manu-futu sira ema futu-manu madena de’it ne’e mak pergunta mai ami. Ita haree konserteza ema durante ne’e hatama ilegál, entaun Ministériu buka meiu halo legál tiha atu emprezáriu ne’ebé de’it bele hatama manu-madena mai. Maibe liuhosi meiu selu tasa ba Estadu atu hapara tiha importasaun ilegál,” Ministru Pedro, hateten,  ba jornalista sira iha Portu-Dili, segunda ne’e.

Lansamentu importasaun futu-manu ne’e, ho bazeia ba dekretu lei númeru 21/2003 ho númeru 1/2006 sobre regulamentu jerál no mós lei mundiál ba saúde animál no International Plant Protection Convention nian ne’ebé haree movimentu sasán tama no sai hosi Timor-Leste.

Nune’e, iha loron 15 dezzembru, MAP hala’o lansamentu ofisiál hodi hatama manu-futu ka madena hamutuk 13 hosi Indonézia mai Timor -Leste liuhosi fonteira Motain atu fó biban ba emprezáriu bele hatama manu-futu tuir lei.

“Baze legál ne’ebé,  ami kria ne’e la’ós Governu mak ba sosa, maibé emprezáriu sira ne’ebe hakarak ba sosa, lei fó dalan ba sira, maibé tenke tuir dalan legál atu selu tasa ba Estadu 5% kada manu-ida hosi folin $50 to’o $100,” nia dehan.

MAP hahú nakloke ba sidadaun hotu atubele halo importasaun ba manu-futu ka madena hosi Indonézia no nasaun seluk, maibé tenke liuhosi Kuarentena atu halo rejista hodi haree kondisaun manu-futu, hafoin hatama mai.

“Ami observa iha territóriu nasionál maioria futu-manu ho manu madena de’it, no la futu ona manu lokál. Ne’ebé haree ema barak krítika, maibé ita kontinua halo buat ne’ebé di’ak atu fó benefisiu ba Estadu,” Ministru Pedro afirma.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here