Diretór Ezekutivu SERVE, Florêncio Sanches. Imajen TATOLI/António Gonçalves

DILI, 19 dezembru 2021 (TATOLI) – Hafoin estadu Timor-Leste hakotu estadu emerjénsia iha territóriu nasionál, halo empreza 35.360 rejista hikas atividade ekonómika ba Servisu Rejistu no Verifikasaun Emprezariál (SERVE) nune’e empreza hirak-ne’e hala’o hikas atividade ekonómika iha rai-laran.

Diretór Ezekutivu  SERVE, Florênço Sanches, informa, iha fulan-outubru simu pedidu emprezariál hamutuk 35.360 hodi  halo fali atividade ekonómika.

“Depois ita laiha ona estadu emerjénsia no laiha konfinamentu obrigatóriu no serka sanitária, ami simu pedidu rejistu emprezariál hamutuk 35.360 hodi  halo fali atividade ekonómiku,” nia informa ba  Agência TATOLI liuhosi telefónika, domingu ne’e.

Nia dehan, maske situasaun Covid-19 seidauk tama ba normalidade maibé empreza timór-oan konxiénsia hodi hala’o hikas atividade ekonómika.

“Númeru rejistu emprezariál fulan-outubru boot tebes, kompara tinan rua ikus ne’e, tanba ita-nia emprezáriu sira hahú hatene ona katak maske ita sei iha situasaun covid-19 maibé sira halo fali atividade ekonomia nune’e hamoris ekonomia nasaun bele lao ba oin,” nia katak.

Nia hatutan, númeru rejistu emprezariál hamutuk 35.360 ninia idikadór ida maka sukursál SERVE dadaun ne’e instala ona iha munisípiu hotu no indikadór seluk maka envolvimentu emprezariu sira iha atividade cesta bázika.

“Tanba ne’e empreza sira la presiza mai tán iha nasionál atu trata dokumentu iha nasionál, manda ba email no ba sukursál ne’ebé maka iha,” nia fó-sai.

Nia esplika, empreza 35.360 ne’e atividade pequena empreza kuaze 60%, médiu empreza 20%, empreza boot ne’ebé rejista halo atividade ekonómiku 5% no atividade investimentu hosi rai-li’ur mai Timor-Leste 0%.

Nia dehan, totál empreza ne’ebé taka permanete atividade durante estadu emerjénsia hamutuk 70-resin.

“Sira taka tanba situsaun maka obriga, kestaun rendimentu, labele ona selu traballadór no kestaun seluk tán,” nia haktuir.

Jornalista       : Natalino Costa

Editór             : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here