DILI, 18 dezembru 2021 (TATOLI)–Prezidente Konfederasaun Desportiva Timor – Leste (CDTL-sigla Portugés) foun, Macario F. Sanches hateten, estrutura foun iha nia lideransa ho vizaun ne’ebé simplie hakarak hakbiit liután federasaun hotu ne’ebé hamahan an iha CDTL nia mahon.
“Ami estrutura foun ho vizaun ida-ne’ebé simples loos katak atu hakbit ka haforsa federasaun sira atu bele hamosu juventude talentu sira-ne’ebé mak bele kompete iha nivél nasional no internasionál, atu bele elabora di’ak liután atu lori CDTL ne’e sai forte liu atu lidera federasaun-sira,” Macario F. Sanches hateten ba Agência TATOLI iha edifisiu CDTL Dili, sábadu ne’e.
Programa importante ne’ebé atu implementa iha nia mandatu mak hamutuk ho membru sira sei promove federasaun hotu la haree ba kór no saida de’it, tau federasaun hotu iha oin atu bele promove mós foinsa’e sira-nia talentu iha modalidade oioin.
“Ita sei promove federasaun sira hotu. Ba federasaun sira-ne’ebé antes ne’e fó ona prestasaun di’ak no ofrese medalla ba Timor-Leste, ita kaer metin nafatin ba sira-ne’ebé antes ne’e seidauk iha prestasaun di’ak ita sei promove nafatin atu sira bele iha vontade atu hakaas an nafatin, tau federasaun hotu iha liña ne’ebé mak hanesan,” nia dehan.
Programa seluk ne’ebé CDTL sei halo iha nia mandatu mak atu fortalese administrasaun CDTL nian, halo modernizasaun administrasaun atu iha kapasidade naton atu bele atende federasaun sira.
“Ita nia kapasidade metin, organizasaun ne’e forte mak foin bele lidera federasaun hotu ho di’ak. Ita haree federasaun balun ho sira-nia atleta nivél olympico, entaun ita tenke koopera di’ak ho Komite Olimpiku Nasionál Timor-Leste, tanba sira mak sei lori atleta sira-ne’e ba kompete iha li’ur. Entaun, ita tenke iha komunikasaun di’ak ho sira, nune’e mós Governu tanba durante ne’e investimentu ba desportu úniku so Governu entaun ita tenke liga sira hamutuk,” nia afirma.
Macario F. Sanches eleitu ba Prezidente CDTL periódu 2021-2025 liuhosi asembleia jerál ne’ebé realiza iha salaun Xanana Sport Centre Dili, iha 11 dezembru foin lalais ne’e hodi troka Prezidente sesante Afranio Xavier Amaral ne’ebé mandatu termina ona.
Lospalos oan ne’e eleitu tanba hetan fiar hosi federasaun hotu ne’ebé hamahan an iha organizasaun CDTL, liuhosi kongresu kompete iha pakote B hasoru pakote A ne’ebé lidera hosi Afranio Xavier Amaral.
Bainhira votasaun Macario hetan votu hamutuk 14 hosi federasaun hamutuk 25 ne’ebé partisipa iha asemblea jeral ne’e no Afranio hetan de’it votu 11.
Tuir oráriu ne’ebé iha Macario ho nia estrutura sei simu pose iha 21 dezembru mai ne’e hodi sai lolos hanesan estrutura ba periudu tinan haat.
Jornalista : Hortencio Sanchez
EDitór : Cancio Ximenes
