Reitór UNITAL, Florindo Pereira. Imajen TATOLI/Egas Cristóvão

DILI, 16 dezembru 2021 (TATOLI)–Universidade Orientál (UNITAL) seidauk deside realiza graduasaun ba estudante finalista tanba Ministériu Ensinu Superiór Siénsia no Kultura (MESSK) seidauk fó sai rezultadu verifikasaun lista estudante 500 ne’ebé universidade submete.

Reitór UNITAL, Florindo Pereira, hateten sira submete ona lista estudante ne’ebé ramata ona ezame ba MESSK iha fulan ida molok atu halo verifikasaun, maibé to’o agora universidade seidauk hetan informasaun.

“Ami hein de’it sira fó sai rezultadu verifikasaun hodi naran sira ne’e bele publika iha Jornál Repúblika maka ami foin deside loron graduasaun,” Reitór Florindo informa iha kampus UNITAL, Becora, kinta ne’e.

Notísia relevante: Universidade tolu submete lista graduasaun 2.101 ba MESSK

Tuir nia, hosi lista ne’ebé submete ona ba ministériu, estudante finalista 336 maka kompleta ona prosesu administrasaun atu hakat ba graduasaun, enkuantu 164 seluk seidauk iha informasaun.

“Ami halo ona konfirmasaun ho parte komisaun organizadora sei fó tan tempu semana ida ba estudante finalista sira atu kompleta administrasaun, liu ida-ne’e maka la konsege ita avansa ho númeru ne’ebé iha,” nia akresenta.

Estudante finalista UNITAL ne’ebé atu kompleta graduasaun iha dezembru tinan ne’e mai hosi fakuldade hitu no kursu 36.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here