Prezidente Repúblika,Francisco Guterres Lú Olo. Imajen Tatoli/António Gonçalves

DILI, 15 dezembru 2021 (TATOLI)—Tuir Konstituisaun Repúblika Demokrátika Timor-Leste (KRDTL), Prezidente Repúblika iha kbiit atu promulga ka veta dekretu ne’ebé Parlamentu Nasionál aprova iha ninia sesaun plenária ka Dekretu-Lei ne’ebé Governu aprova liuhosi Konsellu Ministru.

Iha loron 16 novembru liubá, Parlamentu Nasionál haruka mai Prezidente Repúblika Dekretu ida kona-ba Estatutu Majistratura Judisiál.

“Hafoin tetu klean Dekretu ne’e, Prezidente Repúblika deside veta no haruka fila diploma ne’e ba Parlamentu Nasionál tuir artigu 88.o no 1 Konstituisaun Repúblika,” refere komunikadu imprensa ne’ebé Agência Tatoli asesu lihosi Palásiu Prezidensiál Nicolau Lobato, Bairru Pite, Dili, kuart ne’e. 

Liuhosi mensájen haruka ba Parlamentu Nasionál, Prezidente Repúblika husu ba deputadu sira atu hadi’a Dekretu ne’e iha mós ámbitu Lei kona-ba Organizasaun Judisiária. Lei ida-ne’e promulga ona hosi Prezidente Repúblika no publika ona iha Jornál Repúblika, iha 2 dezembru 2021.

Tuir lei organizasaun judisiária, juíz sira iha Tribunál Administrativu, Fiskál no Kontas haktuir Estatutu Majistratura Judisiál no haktuir mós jurisdisaun hosi Konsellu Superior Majistratura Judisiál.

Dekretu kona-ba Estatutu Majistradu Judisiál sira tenke haktuir regra sira tama ona iha Lei Organizasaun Judisiária.

Iha mensájen haruka ba Parlamentu Nasional, iha 10 dezembru 2021, Prezidente Repúblika fó-hatene mós fundamentu sira seluk relasiona ho ninia desizaun veta Dekretu kona-ba Estatutu Majistradu Judisiál. 

Parlamentu Nasional sei tetu fundamentu hotu-hotu hato’o hosi Prezidente Repúblika iha sesaun Plenária iha loron 90 nia laran, hahú sura hosi loron ne’ebé órgaun soberania ne’e simu dekretu ne’e ho mensájen prezidensiál kona-ba veto.

Parlamentu Nasionál bele hili dalan tolu:

  1. Bele halo konfirmasaun ba votu ho deputadu, mínimu na’in 33. Ho votu a-favór hosi maiória absoluta ne’e, Parlamentu Nasionál bele haruka fila-fali ba Prezidente Repúblika hodi promulga Dekretu ne’e iha prazu loron ualu nia laran, tuir artigu 88.ono 2 Konstituisaun Repúblika;
  2. Bele halo expurgasaun ka alterasaun ba Dekretu ne’e tuir fundamentu sira-ne’ebé Prezidente Repúblika hato’o liuhosi nia mensájen;
  3. Parlamentu Nasionál la halo reuniaun to’o prazu loron 90 ramata. Se Parlamentu Nasional hili dalan ida-ne’e, Dekretu ne’e kaduka ka mate.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here