Primeiru-Ministru Taur Matan Ruak akompaña  hosi espoza ho Xefe Gabinete, iha kuarta kalan ne’e,  presta omenajen ba Saudozu Max Stahl nia Ahu-kdesan. imajen/ Media PM

DILI, 15 dezembru 2021 (TATOLI)— Primeiru-Ministru Taur Matan Ruak akompaña  hosi espoza ho Xefe Gabinete, iha kuarta kalan ne’e,  presta omenajen ba Saudozu Max Stahl nia Ahu-kdesan iha Sentru Áudiovisual Max Stahl nian, Kolmera-Benfika Dili.

Biban ne’e, Xefe Governu konsidera Saudozu Max Stahl  importante tebes tanba dezempeña nia papel importante ida ba Timor-Leste nia luta ba ukun rasik an.

Primeiru-Ministru Taur Matan Ruak presta omenajen ba Saudozu Max Stahl nia Ahu-kdesan. Imajen/ média PM

“Nasaun tomak, povu tomak, Estadu Timor fó omenajen ida ne’e tanba nia papél ne’ebé nia dezempeña durante ita-nia luta, espesialmente ba iha kazu 12 de Novembru joven sira nia luta,”  Xefe Governu dehan  ba jornalista-sira.

Eis Xefe Estadu-Maiór FALINTIL ne’e afirma, papel Saudozu Max Stahl no media sira importante iha luta ba libertasaun nasionál, hodi fanun mundu tomak no sensibiliza mundu kona-ba sofrimentu timoroan sira nian, espesiál iha Masakre Santa Cruz 12 Novembru 1991.

“Se média la iha, ema ignora ita, ema la koñese ita, ema la hatene ita no papél média nian no papél Max Stahl nian fundamental loos fanun ema hotu, fanun mundu tomak, sensibiliza sira hotu katak buat ne’ebé sira hatene la hanesan la’o iha rai laran”, tenik.

Saudozu Max mak halo filmagem kona-ba brutalidade Forsa Indonézia nian iha akontesimentu masakre Santa Cruz, 12 Novembru 1991.

Ba nia dedikasaun refere, Estadu Timor-Leste konsidera Max Stahl hanesan erói nasionál ida, hodi atribui Grau Colar Ordem de Timor-Leste ho titulo póstumo, nu’udar jestu agradesimentu Estadu ba Saudozu nia kontribuisaun iha luta ba libertasaun nasionál.

Saudozu Max Stahl nu’udar ema Britániku, moris iha loron 06 fulan-dezembru tinan 1954, no husik mundu iha loron 28 fulan-outubru tinan 2021 iha Ospitál Brisbane, Austrália, tanba sofre moras.

Governu presiza prezerva CAMSTL

Entretantu, Artista Senior Timor-Leste Ego Lemos, informa Saudozu Max Stahl nia memoria ne’ebé maka labele haluhan mak nomea nia parte  sai manan nain ba prémiu Sergio Viera de Mello iha  tinan 2018.

“Ha’u foin maka koñese maun Max Stahl, hafoin ukun aan, maibé buat ne’ebé ha’u la haluhan mak maun Max Stahl rasik nomea ha’u ba prémiu ida ne’e no ha’u manan duni no Prezidente Repúblika atribui ba ha’u iha loron 10 dezembru 2018,” Artista Senior ne’e afirma ho triste.

Ego Lemos konsidera Max Stahl nu’udar eroi ida ne’ebé extra-ordinária ba povu Timor-Leste tanba hosi nia filmajen trajédia 12 Novembru 1991 bele loke mundu nia matan kona ba violasaun grave iha Timor-Leste.

“Maun Max Stahl ne’e eroi ida ba Timor-Leste, ne’ebé ninia memoria sei la lakon iha povu Timor-Leste nia memória,” ia akresenta.

Nune’e, nia husu ba Governu atu dezenvolve no prezerva Sentru Audivisuál Max Stahl Timor-Leste (CAMSTL,sigla Portugés)  hodi sai memoria ba  istória Timor-Leste nian independensia.

“Ha’u mós rekomenda atu Governu tau atensaun Sentru ne’e, nune’e bele dezenvolve ho di’ak atu forma joven sira ne’ebé iha talentu jornalista bele tuir maun Max nia ain-fatin,” nia afirma.

Daudaun, Sinza Saudozu Max Stahl hatoba iha CMASTL durante loron rua loron tolu, hahú hosi 15 to’’o 17 dezembru hafoin mak haloot iha semitériu Santa Cruz.

Nune’e, iha loron 15 dezembru sei presta omenajen, hahú hosi orgaun soberanu sira, liña ministeriál, sosiedade sivíl inklui estudante hosi universidade sira.

Iha loron 16 dezembru sei iha atividade konta istória hosi ema sira ne’ebé uluk iha komunikasaun ho Max Stahl.

Iha loron 17 dezembru dadersan, sei lori sai hosi CAMTL ba Motael halo misa ikus nian ne’ebé planu sei prezide hosi Arsebispu Arkidioseze Metropilitana Dili, Don Virgílio do Carmo da Silva, tanba hato’o ona karta, misa hotu sei la’o ain ba to’o semitériu Santa Cruz hodi haloot.

Sinza Saudozu Max Stahl sei haloot iha Simitériu Santa Cruz, ne’ebé hanesan fatin akontese Masakre Santa Cruz 1991, no fatin hakoi ka subar rollu ne’ebé mak nia hasai foto no video, atu Militár indonéziu labele foti.

Jornalista :  Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here