Ministru Ensinu Superiór, Siénsia no Kultura, Longuinhos dos Santos. Imajen TATOLI/Egas Cristóvão

DILI, 15 dezembru 2021 (TATOLI)–Dosente na’in-140 hosi Instituisaun Ensinu Superiór (IES) privadu tuir ona teste lian portugés atu konkorre bolsa estudu mestradu no doutoramentu iha universidade Portugal.

Ministru Ensinu Superiór Siénsia no Kultura, Longuinhos dos Santos, hateten, programa bolsa estudu ne’e hahú ona dezde tinan 2019.

“Tinan-ne’e ita loke vaga 56 ba dosente sira, maibé iha ona dosente 140 mak interese ba vaga ne’e no daudaun sira tuir ona teste, kuandu sira liu mak sei tuir fali kursu lian portugés fulan-neen no bainhira hatudu rezultadu di’ak maka sei ba Portugal hodi kontinua estuda,” Ministru Longuinhos hateten iha resintu Parlamentu Nasionál, kuarta ne’e.

Inisiativa Ministériu Ensinu Superiór Siénsia no Kultura (MESSK) realiza programa ne’e atu ajuda hadi’a, hasa’e kualidade no kapasidade rekursu umanu iha IES privadu.

“Durante ne’e universidade públika hanesan Universidade Nasionál Timor-Leste (UNTL) no Institutu Politéknika Betano (IPB) sira goza ona sira-nia autonomia rasik,” Ministru akresenta.

Oportunidade ne’e sei kontinua iha tinan oin ba de’it nasaun Portugal tuir kursu ne’ebé termina ona.

“Ne’e duni kursu mestradu tinan-rua no doutoramentu mínimu tinan-tolu ba leten, maibé molok atu dezloka sira tenke hetan kapasitasaun pelumenus iha ona koñesimentu bele ko’alia portugés,” governante ne’e tenik.

Iha biban hanesan, Profesora lian portugés, Suzana Mendonça, hateten, situasaun COVID-19 akontese iha mundu tomak, tanba ne’e sei limite kuota ba de’it nasaun ida.

Nune’e mós, Vise Reitór Institute of Business (IOB), Lucio Barros, nu’udar partisipante iha teste lian portugés, dehan, dosente na’in-18 iha universidade privada ne’e mak tuir teste, kompostu hosi na’in-hitu konkorre ba vaga mestradu no na’in-11 ba doutoramentu.

“Teste bolsa estudu ba dosente sira hosi Timór laran tomak ne’e,” nia tenik.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here