Prezidente Repúblika, Francisco Guterres ‘Lú Olo’ hala’o diálogu komunitária “Dala-lia ho Lú Olo” iha Jináziu Maliana, munisípiu Bobonaro. Imajen mídia PR.

BOBONARO, 15 dezembru 2021 (TATOLI) – Vise-Ministru Agrikultura no Peska (MAP),  Abílio Xavier de Araújo, kuarta ne’e halo promesa iha Prezidente Repúblika, Francisco Guterres ‘Lú Olo’ nia oin, katak prioritiza irrigasaun Maliana II iha Orsamentu Jerál Estadu (OJE) tinan fiskál 2022.

Vise-Ministru Agrikultura no Peska, Abílio Xavier de Araújo, hato’o asuntu ne’e hodi hatán ba preokupasaun Xefe suku Tapo-Memo, Joaquim dos Santos, durante diálogu ho Prezidente Repúblika, Francisco Guterres Lú Olo, iha Jináziu Maliana, kinta ne’e.

“Iha tinan 2021 ita prevee orsamentu ne’ebé alokadu hodi reapropria serbisu balun ne’ebé mak ita extende ba 2022, tanba ne’e ha’u hanoin to’os-na’in no veteranu sira katak irrigasaun Maliana II ita hatama iha prioridade ba konstrusaun iha tinan oin,” nia promete iha intervensaun.

Iha programa diálogu entre komunidade ho Prezidente Repúblika ne’e fó tempu ba governante sira responde tuir ejizénsia komunidade nian nune’e bele orienta ba prátika ezekusaun.

Enkuantu kona-ba irrigasaun iha postu administrativu Cailaco prosesu konstrusaun konklui ona no irrigasaun seluk ne’ebé iha munisípiu Bobonaro daudaun ne’e tékniku MAP nian koordena ho parseiru dezenvolvimentu sira halo hela estudu viabilidade, atubele haree mudansa klimátika ne’ebé kada tinan sempre akontese, nune’e bele garante nia sustentablidade ba tempu naruk.

Purtantu irrigasaun parte postu administrativu Atabae, daudaun ne’e ekipamentu pezadu hanesan eskavadór ida iha hela terrenu, atu halo antisipasaun serbisu iha tempu udan, nune’e labele estraga komunidade nia natar.

“Serbisu sira-ne’e presiza komunidade sira no ita hotu nia kooperasaun, ita tenke iha sentidu perténsia na’in ba ita-nia rai, atubele hasa’e produsaun rai-laran hodi la depende ba produtu importadu sira,” nia hatutan.

Xefe suku Tapo-Memo, Joaquim dos Santos, informa iha diálogu hi xefe estadu katak, iha tempu natar komunidade nian 90% mak abandona durante tinan barak, tanba laiha irrigasaun, tanba ne’e presiza tebes governu konstrui irrigasaun Maliana II nune’e bele fornese bee ba natar sira hotu.

Komunidade Munisípiu Bobonaro hala’o diálogu ho Prezidente Repúblika iha Jináziu Maliana, munisípiu Bobonaro. Imajen mídia PR.

“Ami sente kontente bainhira rona dehan governu planu atu halo konstrusaun iha tinan oin, espera bele realiza lalais, atubele motiva agrikultór sira hasa’e produsaun hare, tanba sira iha vontade atu halo serbisu hanesan to’os-na’in,” nia espresa.

Entretantu natar ne’ebé durante ne’e abondona tanba dependénsia liu ba udan-been, maibe bainhira governu konstrui iha tinan oin sei fó benefísiu boot ba agrikultór sira hosi suku Tapo-Memo, Holsa, Odomau no Ritabou balun.

Irrigasaun Maliana II sei foti rekursu bee iha bee-matan Ilculba ne’ebé ninia área lokalizasaun baliza entre suku Tapo-Memo ho suku Saburai nian.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here