Diretór Sentru Treinamentu Vokasionál Juventude (STVJ) Comoro, Norberto da Costa (klaran), hasai retraru hamutuk ho benefisiáriu sira. Imajen/Doc. STVJ Comoro.

DILI, 14 dezembru 2021 (TATOLI)—Diretór Sentru Treinamentu Vokasionál Juventude (STVJ) Comoro, Norberto da Costa, informa daudaun ne’e STVJ Comoro fó hela formasaun kona-ba formadór ba funsionáriu Sekretáriu Estadu Koperativa (SECoop, sigla portugés) atu funsionáriu sira bele fasilita fali formasaun ne’ebé di’ak iha sira-nia fatin.

“Formasaun ne’e foka liubá formadór sira, tanba funsionáriu sira SECoop kuaze formadór hotu mak mai tuir formasaun ida-ne’e, atu nune’e sira bele ba fasilita formasaun ne’ebé di’ak liután iha sira-nia fatin,” Norberto da Costa hateten ba Agência Tatoli iha nia knar-fatin Comoro, Dili, tersa ne’e.

Formasaun ba formadór sira-ne’e, ho durasaun loron 15, tanba iha loron lima formasaun hahú iha loron 17 fulan dezembru ne’e no loron 10 restu ne’e sei kontinua fila-fali iha fulan-janeiru tinan 2022.

Nia dehan, materia ba formasaun sei foka liubá tékniku mak hanesan oinsá atu prepara klase, prepara planu, prepara rekursu no oinsá atu dezeña.

Formasaun ne’e realiza tanba antes ne’e SECoop hetan rekomendasaun hosi parte Institutu Nasionál Dezenvolvimentu Mão-de-Obra (INDMO) rekomenda ba SECoop atu funsionáriu SECoop bele tuir formasaun iha STVJ Comoro.

“INDMO hanesan institutu ne’ebé regula sentru formasaun hotu-hotu no kualker formadór ne’ebé atu hetan sertifikasaun hosi INDMO, presiza hetan kualifikasaun formasaun,” nia dehan.

Entretantu, iha formasaun ne’e funsionáriu SECoop hamutuk 18 mak tuir formasaun iha área formadór no hosi númeru ne’e kompostu hosi Diretór Jerál, Diretór Nasionál no Xefe Departamentu sira.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here