Nesesidade bázika ne'ebé transporta hosi Dili ba Baucau iha loja Gemea, tersa (14/12). Imajen Tatoli /Natalino Belo.

BAUCAU, 14 dezembru 2021 (TATOLI) – Folin nesesidade bázika daudaun ne’e sa’e iha Munisípiu Baucau tanba folin kontentór karun iha portu Dili tanba ne’e konsumudór sira husu Governu halo intervensaun ho urjénsia.

Diretór Loja Gemea, Bernardo Domingos Guterres, esplika, folin nesesidade bázika sa’e tanba bazea ba distribudór sira iha Dili ne’ebé dadaun ne’e hahú hasa’e folin tanba kustu kontentór ne’ebé besik tempu Natál no tinan foun sa’e.

“Ami ba husu iha ajénsia distribuidór sira iha Dili folin sasán sa’e tanba ró mak la atraka, fulan ida dala-ida de’it, depois folin kontentór sa’e nune’e buat hirak-ne’e influénsia sasán folin sa’e iha Baucau,” Diretór Loja Gemea informa ba Agência TATOLI,  iha Vila Nova, tersa ne’e.

Diretór Loja Gemea, Bernardo Domingos Guterres. Imajen Tatoli/Natalino Belo.

Sasán ne’ebé presu sa’e iha munisípiu Baucau mak hanesan mina litru-lima ne’ebé antes ne’e dollar $16 kada dós maibé daudaun ne’e sa’e dolar $28, nune’e fa’an fali mina litru-lima ho folin $7,50.

Nune’e mós fós ho kilograma 24 ne’ebé antes ne’e ho folin $11,50 agora sa’e ba $13 no kilograma 30 sa’e ba dolar $16.50.

Bernardo akresenta, daudaun ne’e atividade fa’an no sosa sei normál hela maibe bainhira besik selebrasaun Natál no tinan foun maiória konsumidór sira barakliu kompra bebida, trigu, mantolun no mantega.

“Maioria folin sa’e, mantolun uluk rák ida folin $4, agora sa’e ba $6.50 tanba iha Dili sa’e ba $6,” Bernardo hateten.

Nia husu Governu halo intervensaun hodi neutraliza situasaun ne’e tanba dezempregu sei barak, liuliu tenke kontrola iha sentrál Dili. 

Sasán nesesidade bázika ne’ebé transporta hosi Dili ba Baucau iha loja Gemea. Imajen Tatoli/Natalino Belo.

Konsumidór Teresa Maria Freitas nu’udar agrikultór sente triste ho folin sasán ne’ebé hahú sa’e nune’e husu governu atu neutraliza tanba tempu Natál no tinan foun folin sasán sempre sa’e. 

Diretór Servisu MTKI Munisípiu Baucau, Sabino dos Santos, rekoñese dadaun-ne’e nesesidade bázika sa’e iha Baucau tanba besik selebrasaun Natál no tinan foun.

Nia parte sei hato’o prekupasaun hirak-ne’e bainhira enkontru ho parte diresaun nasionál inklui Sentru Lojístika Nasionál (CLN, sigla portugés) atu halo intervensaun ba folin sasán iha merkadu.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here