Imajen/Media PR.

DILI, 10 dezembru 2021 (TATOLI)—Parlamentu Nasionál liuhosi diskusaun espesialidade ba porposta lei Orsamentu Estadu Jerál (OJE) 2022, sexta ne’e aprova proposta Orsamentu Jerál Estadu 2022   ba Ministéiru Solidariedade Sosiál no Inkluzaun (MSSI) ho montante $22,727,705 iha espesialidade ho afavór-44, kontra 0 no abstensaun 21.

“Nune’e Orsamentu Jerál Estadu ba Ministéiru Solidariedade Sosiál no Inkluzaun (MSSI) pasa,’’ Prezidente Parlamentu Nasionál, Aniceto Longuinhos Guterres Lopes, anunsiu liu hosi plenária

PN aprova mós proposta ida hosi reprezentante povu sira husu adisionál $520.000 atu halo akizisaun ba karreta funeráriu ba munisípiu hotu.

Maibé Ministra Silidariedade Sosiál no Inluzaun, Armanda Berta dos Santos, pronunsia katak kona-ba akizaiaun karreta funerál atu aloka ba nasionál iha OJE 2021 tau ona osan ne’ebé daudaun iha hela prosesu akizisaun, nune’e la konkorda ho proposta ne’e atu tau ba MSSI.

Primeiru Ministru, Taur Matan Ruak, aseita ho deputadu balun katak proposta ne’e atu sosa karreta funeráriu ba Munisípiu, nune’e proposta refere labele tau iha MSSI no tau ba orsamentu munisípál nian.

Maske nune’e, hosi parte proponente sira la retira proposta ne’e hodi kontinua ba votasaun ho rezultadu votasaun a-favór 48, kontra ida (1) no abstensaun 16, nune’e proposta refere pasa.

Nune’e, orsamentu adisionál ne’e pasa sei aloka fali ba munisípiu sira sei formula montante espesifiku hodi sosa karreta funerál ne’ebé aloka ba munisípiu sira.

Justifikasaun hosi proponente sira katak, orsamentu adisionál ne’e presiza tanba atu sosa karreta funerál 13 hodi fó apoiu ba ospitál sira iha munisípiu 13, hodi atende nesesidade urjente povu sira-nian no kada karreta prevee rihun $40.

Proposta ne’e mai hosi hosi Helena Martins Belo, Nelia Menezes ho Elbina Sousa.

Iha orsamentu ho montante ba MSSI ho montante $22,727,705 sei aloka ba saláriu vensimentu $1,922,900, bens servisu $4,383,785, kapitál menór $218,280, kapitál dezenvolvimentu $1,713,600 no transferénsia públika $14,489,140, no hosi orsamentu ne’e sei finansia programa rua (2), sub-programa 18 no atividade 47.

Programa boa-governasaun no jestaun instituisionál sei gasta $6,194,117 no programa igualidade jéneru no inkluzaun sosiál sei gasta $16,533,588.

Programa programa igualidade jéneru no inkluzaun sosiál ho nia objetivu médiu prazu sistema protesaun sosiál integrál no universál integradu, atu alkansa protesaun sosiál no redús ki’ak.

Ninia sub-programa protesaun solidariedade sosiál no inkluzaun ho nia atividade monitorizasaun implementasaun seguransa.

Sub-programa protesaun no promosaun direitu ba ema ho defisiénsia ho nia atividade promove direitu ba ema portadora defisiénsia intelektuál, atividade monitorizasaun ba implementasaun ba planu asaun nasionál ba ema ho defisiénsia, atividade promosaun direitu ba ema ho defisiénsia, atividade konsellu nasionál ba ema ho defisiénsia.

No sub-programa reabilitasaun no reintegrasaun ba ema ho problema saúde mentál no defisiénsia, ho nia atividade apoiu no resgate ba ema ho defisiénsia mentál iha uma moras mentál, atividade empoderamentu no reintergasaun komunitária.

Sub-programa protesaun labarik iha risku no perigu ho nia atividade dezenvolve programa implementasaun polítika no lei protesaun labarik, atividade implementa polítika bem-estar sosiál ba labarik no família.

Sub-programa protesaun direitu labarik ho nia atividade promosaun direitu ba labarik.

Sub-programa sosializasaun no sensibilizasaun ho atividade sensivilizasaun protesaun direitu labarik to’o ba iha komunidade lokál inklui autoridade militár fronteira.

Sub-programa apoiu veíkulu funerál no kaixaun nia atividade mak atividade apoiu família enlutada, transladasaun mate-isin iha exteriór.

Sub-programa bolsa da mãe nia atividade bolsa da mãe (subsídio de apoio condicional), dadus rejistu no verifikasaun bolsa da mãe.

Sub-programa asisténsia sosiál ka umanitáriu mak fó apoiu umanitária (imediata e atempada),  apoiu emerjénsia família afetadu dezastre naturál.

Sub-programa inkluzaun sosiál mak sei parseira ho instituisaun solidariedade sosiál (ISS) ba protesaun reintegrasaun komunidade no inkluzaun sosiál, partisipasaun iha arte no kultura, kapasitasaun komunidade no inkluzaun sosiál.

Sub-programa reintegrasaun komunitária ba labarik iha programa ho lei, ba dadur no eis prizoneiru, atividade reintegrasaun LGBTI no idozu abandona, reintegrasaun ba ema ne’ebé afeta droga no konflitu pasadu iha komunidade.

Sub-programa implementasaun NAP-rezolusaun 1325 (2000) ONU kona-ba WPS ho nia atividade promove inisiativa feto ba pás no koezaun sosiál, implementasaun rekomendasaun relatóriu “Chega!” relasiona ba pás no koezaun sosiál.

Sub-programa implementasaun NAP-GBV nia atividade empoderamentu ekonomia ba vítima violénsia bazea ba jéneru, monitoriza implementasaun ba uma mahon sira, formasaun jere kazu violénsia bazea ba jéneru, proteze feto no LGBTI iha situasaun hasoru violénsia bazea ba jéneru.

Sub-programa kuidadu no apoiu programa HIV-SIDA ho nia atividade apoiu alimentasaun ba iha uma rekuperasaun saúde.

Sub-programa prevensaun no edukasaun mak sensibilizasaun informasaun kona-ba prevensaun transmisaun virus HIV-SIDA.

Entretantu programa boa-governasaun no jestaun instituisionál ho nia sub-programa tolu no atividade 16.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here